O‘zbekiston Sog‘liqni saqlash vazirligi ma’lumotiga ko‘ra, Ramazon hayiti va Navro‘z bayramlarini nishonlash kunlarida – 20-23 mart kunlari mamlakatdagi barcha kasalxonalar, ixtisoslashtirilgan markazlar va oliy o‘quv yurtlari klinikalari bemorlarni qabul qilishni odatdagi tartibda davom ettiradi. Bu davrda dezhurlikda 20 mingga yaqin shifokor va hamshiralar bo‘lishi rejalashtirilgan.

Hududlarda 39 ta tumanlararo markazlar faoliyatini to‘xtatmasdan ishlaydi. Barcha tibbiy muassasalar zarur dorilar va zaxira o‘rinlar bilan ta’minlangan. Shuningdek, tez tibbiy yordam xizmati ham bayram kunlarida odatdagi tartibda ishlashda davom etadi. Mamlakat bo‘ylab “103” xizmati va uning filiallari chaqiruvlarga tayyor: shaharlar va tumanlarda 2,8 mingdan ortiq brigadalar dezhurlik qiladi.

Tug‘ruqxonalar va bolalar klinikalari ham dam olish kunlarisiz ishlaydi. Vazirlik ma’lumotlariga ko‘ra, tibbiy xodimlarning faoliyatini muvofiqlashtirish uchun maxsus shtab tashkil etilgan. Sog‘liqni saqlash vazirligi bayram kunlarida smenaga chiqadigan barcha tibbiy xodimlarga minnatdorchilik bildirdi.

Eslatib o‘tamiz, 2025 yilda mamlakat bo‘ylab “103” tez tibbiy yordam xizmatiga 14,3 milliondan ortiq chaqiruv kelgan. Elektron avtomatlashtirilgan boshqaruv tizimini joriy etish hisobiga brigadalarning o‘rtacha yetib borish vaqti 25-30 daqiqadan 10-15 daqiqagacha qisqargan.

Source: podrobno.uz