“O‘zbekneftgaz” tarkibidagi “Neftgazmontaj” korxonasining faoliyati kompaniya rahbari Abdug‘ani Sanginov boshchiligidagi yig‘ilishda keskin tanqid ostiga olindi. Yig‘ilishda korxonadagi ish jarayonlari eskirgan, raqamlashtirilmagan tizimlar yordamida olib borilayotgani, manfaatlar to‘qnashuvi va zamonaviy boshqaruv mexanizmlarining yo‘qligi tanqid qilindi. Bu holat nafaqat samaradorlikni pasaytirgan, balki moliyaviy intizomga ham salbiy ta’sir ko‘rsatgan.

Hisobotlarga ko‘ra, qurilish hajmi 21,4% ga kamaygan, omborlardagi inventarizatsiya darajasi esa asossiz ravishda 129% ga oshgan. Bundan tashqari, ishchilarga noyabr oyidan beri maosh to‘lanmaganligi aniqlandi. Kompaniya ma’lumotlarida “Neftgazmontaj” aktivlari “deyarli o‘z samaradorliklarini yo‘qotgan” deb baholandi: 562 ta uskunaning yarmidan ko‘pi ishlamayapti, jumladan 128 tasi butunlay yaroqsiz, 218 tasi esa nosoz holatda. Ko‘p yillar davomida texnik xizmat ko‘rsatilmagani sababli avtopark yaroqsiz holga kelgan va GPS kuzatuv tizimining yo‘qligi transport vositalarini nazorat qilishni susaytirgan.

Yig‘ilishda tanish-bilishchilikning keng tarqalganligi ham muhokama qilindi. Ayrim rahbarlar va yuqori lavozimdagi xodimlar tomonidan yaqin qarindoshlarni yollash holatlari tizimli tus olgan, bu kadrlar siyosatidagi adolat tamoyillarini buzgan va samaradorlikka salbiy ta’sir ko‘rsatgan. Tadbirdan so‘ng, manfaatlar to‘qnashuviga yo‘l qo‘ygan va moliyaviy qoidabuzarliklarning oldini olmagan komplayens inspektori, shuningdek, iqtisodiyot va qurilish bo‘yicha direktor o‘rinbosarlari lavozimidan ozod etildi.

Abdug‘ani Sanginov kompaniyani moliyaviy tomondan tartibga keltirish bo‘yicha ko‘rsatmalar berdi. U raqamli hujjat aylanishi va g‘aznachilik tizimini zudlik bilan joriy etish, davlat xaridlari tizimiga qat’iy rioya qilish, buxgalteriya faoliyatini to‘liq audit qilish va xaridlar shaffofligini oshirish vazifalarini qo‘ydi. Shuningdek, samarasiz aktivlar—yaroqsiz uskunalar va inshootlar auksionga qo‘yilishi va nosoz uskunalar imkon qadar tezroq ta’mirlanishi kerakligi belgilandi.

“Neftgazmontaj” direktori ishdan bo‘shatilib, rahbar vazifasini bajaruvchi etib qayta lavozimiga qo‘yildi va unga 3 oylik sinov muddati berildi. “O‘zbekneftgaz” rahbari xodimlarga bir hafta ichida to‘lanmagan ish haqini to‘lashni buyurdi. Bundan tashqari, korxonani zamonaviy uskunalar bilan ta’minlash, uni yirik pudratchi kompaniyaga aylantirish, ish hajmini o‘n baravarga oshirish, shuningdek, xodimlar sonini mutanosib ravishda optimallashtirish va ish haqini oshirish masalasi ko‘rib chiqilishi vazifasi qo‘yildi.

Source: www.gazeta.uz