Qoraqalpog‘istonning Chimboy tumani sog‘liqni saqlash bo‘limida kuchli ta'sir qiluvchi dorilarning aylanishi va saqlanishi qoidalarining buzilishi aniqlangan. Bu yerda mansabdor shaxslarning beparvoligi tufayli uchta ampula kuchli ta'sir qiluvchi narkotik analgetik yo‘qolgan.

Bosh prokuratura huzuridagi departamentning tuman bo‘limi tomonidan o‘tkazilgan tergovga qadar tekshiruv davomida qoidabuzarliklar fosh etilgan. Aniqlanishicha, tibbiyot muassasasining mansabdor shaxslari narkotik preparatlarni maxsus ruxsatnomaga ega bo‘lmagan uchta palata hamshirasiga saqlash uchun topshirgan, shundan so‘ng "Promedol 2% 1 ml" preparatining uchta ampulasi yo‘qolgan.

Ushbu fakt bo‘yicha Jinoyat kodeksining 275-moddasi (Giyohvandlik vositalari, ularning analoglari yoki psixotrop moddalarni ishlab chiqarish yoki ular bilan muomala qilish qoidalarini buzish) bilan jinoyat ishi qo‘zg‘atilgan. Qonunbuzarlarga 25-50 bazaviy hisoblash miqdoridagi jarimadan besh yilgacha ozodlikdan mahrum qilishgacha bo‘lgan jazo choralari qo‘llanilishi mumkin.

Avvalroq Buxoro viloyati tuman tibbiyot birlashmasining anesteziologiya va reanimatsiya bo‘limining feldsheri va hamshiralari og‘ir bemorlar uchun mo‘ljallangan narkotik preparatlarni o‘g‘irlagan edi.

Source: podrobno.uz