O‘zbekistonda yo‘l harakati qoidalarini buzgan haydovchilarga nisbatan jazo choralari kuchaytirilmoqda. YHXX matbuot xizmati rahbari Zoyir Yo‘ldoshevning ma’lum qilishicha, 49 nafar haydovchi 12 balldan yuqori ball to‘plagan va ularga oid hujjatlar sud organlariga yuborilgan.

Umuman olganda, 132 nafar haydovchi sakkiz balldan yuqori ballarni olgan. Bu ko‘rsatkich yangi jarima ballari tizimi joriy etilganidan keyin qayd etilgan birinchi natijalardir.

Eslatib o‘tamiz, 2025-yil 1-iyundan boshlab yo‘l-patrul xizmati xodimlari tomonidan Ma’muriy javobgarlik to‘g‘risidagi kodeksning 12 moddasi asosida yozilgan bayonnomalar bo‘yicha jarima ballari hisoblana boshlagan. 2026-yil 1-apreldan esa avtomatik ravishda aniqlovchi qurilmalar tomonidan qayd etilgan to‘rt turdagi qoidabuzarliklar uchun ham ballar qo‘shiladi.

Jarima ballari sakkiz ballga yetganda, haydovchi mobil telefoniga SMS orqali ogohlantiriladi. 12 balldan oshganda esa haydovchilik huquqi sud tartibida bekor qilinadi va haydovchi guvohnomani qayta olish uchun avtomaktabda o‘qib, imtihon topshirishi kerak.

Source: www.gazeta.uz