So‘nggi kunlarda ijtimoiy tarmoqlarda hantavirusning bir qator mamlakatlarda tarqalishi haqidagi xabarlar tufayli xavotir kuchaydi. Biroq O‘zbekistonda epidemiologik vaziyat barqaror bo‘lib, hech qanday kasallanish holati qayd etilmagan va infeksiyaning keng tarqalish xavfi juda past deb baholanmoqda.
Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Atabekov vaziyatni tushuntirib, aholini vahima qilmaslikka chaqirdi. Uning so‘zlariga ko‘ra, bugungi kunda O‘zbekistonda hantavirus bilan kasallanish holatlari qayd etilmagan va epidemiologik vaziyat nazorat ostida.
Jahon sog‘liqni saqlash tashkiloti ma’lumotlariga ko‘ra, bu virus COVID-19 kabi tez tarqalish xususiyatiga ega emas va global pandemiyaga sabab bo‘la olmaydi. Hantavirus asosan kemiruvchilar orasida aylanadi va odamga kamdan-kam hollarda yuqadi.
Kasallikning asosiy belgilari: isitma, bosh og‘rig‘i, holsizlik, ko‘ngil aynishi, mushak va qorin og‘rig‘i. Og‘ir holatlarda buyrak, nafas olish va yurak-qon tomir tizimlarining shikastlanishi mumkin. Hozircha maxsus vaktsina yoki universal davolash usuli mavjud emas, terapiya simptomatik xarakterga ega.
Mutaxassislarning ta’kidlashicha, oddiy gigiena qoidalariga rioya qilish orqali yuqtirish xavfini minimallashtirish mumkin: turar joy va ish xonalarini toza saqlash, mahsulotlarni yaxshilab yuvish, kemiruvchilar bilan aloqadan qochish va xonalarni muntazam shamollatish.
Mamlakatda kuchaytirilgan sanitariya nazorati o‘rnatilgan: 53 ta chegara punktida yuqumli kasalliklarning kirib kelishining oldini olish uchun doimiy monitoring olib borilmoqda. Rasmiylar fuqarolarni vazminlikni saqlashga, faqat rasmiy manbalarga tayanishga va kerak bo‘lganda shifokorlarga murojaat qilishga chaqiradi.
Eslatib o‘tamiz, bortida hantavirusdan o‘lim holatlari qayd etilgan “Xondius” kruiz kemasi Tenerife oroliga yetib keldi. Laynerdan evakuatsiya kuchaytirilgan xavfsizlik choralari ostida o‘tkazildi – odamlar kichik guruhlarga bo‘lib chiqarildi va qattiq karantinga yuborildi.
Source: podrobno.uz