Toshkent viloyati, Angren yaqinidagi Lashkerek qishlog‘ida joylashgan zipline attraksioni noqonuniy ekanligi aniqlandi. Tekshiruv natijasida attraksion demontaj qilindi.

Eslatib o‘tamiz, avvalroq ushbu ziplineda ikki kishi havoda to‘qnashgani aks etgan videolar ijtimoiy tarmoqlarda tarqalgandi. Dastlabki ma’lumotlarga ko‘ra, ulardan biri marshrut o‘rtasida tiqilib qolgan, ikkinchisi esa yordam berish maqsadida unga tomon harakatlangan bo‘lishi mumkin. Rasmiy tasdiq hali mavjud emas.

Hodisa joyiga tezda FVV xodimlari va tegishli idoralar vakillari yetib keldi. Tekshiruv shuni ko‘rsatdiki, attraksion kerakli ruxsatnoma hujjatlarisiz ishlagan.

FVV ma’lumotiga ko‘ra, hodisa natijasida hech kim jabrlanmagan. Noqonuniy obyekt demontaj qilinib, tashkilotchilarga nisbatan ma’muriy choralar, jumladan jarimalar qo‘llanildi.

Favqulodda vaziyatlar vazirligi fuqarolarni ehtiyot choralariga rioya qilishga va rasmiy ruxsatga ega bo‘lmagan attraksionlardan foydalanmaslikka chaqirdi.

Avvalroq poytaxt bog‘larida attraksionlarni ommaviy tekshirish boshlangandi. Mutaxassislar uskunalarning sozligi va xodimlarning favqulodda vaziyatlarga tayyorligini tekshirmoqda. Bunga Andijondagi “Bog‘ishamol” bog‘ida attraksionning qulashi sabab bo‘lgan.

Source: podrobno.uz