Buxoroning eski shahar qismida noqonuniy havo sharlari sotuvchisining ehtiyotsizligi tufayli sayyohlar deyarli jarohat oldi. Ijtimoiy tarmoqlarda e'lon qilingan videolarda odamlar kafeda stollarda o‘tirgani, ularning yonidan uchib o‘tayotgan havo sharlari to‘satdan alanga olib, portlagani aks etgan. Kafega tashrif buyurganlar chetga yugurib qutilishga ulgurgan.

Viloyat IIB matbuot xizmati xabariga ko‘ra, hodisa shaharning tarixiy qismida sodir bo‘lgan. Gaz bilan to‘ldirilgan ko‘plab sharlar havoga ko‘tarilib, elektr uzatish liniyasiga tegib ketgan. Qisqa tutashuv yuz berib, sharlar yonib, portlay boshlagan.

Tekshiruv davomida sharlarni 19 yoshli fuqaro sotgani ma'lum bo‘ldi. U bozorda oddiy sharlarni sotib olib, ularni tanishining xususiy uyida maishiy tabiiy gaz bilan to‘ldirgan.

Sotuvchi va uy egasiga nisbatan ma'muriy bayonnomalar tuzilgan. Aholi ko‘cha sotuvchilaridan havo sharlari sotib olayotganda ehtiyot bo‘lishga va gaz bilan tajribalar o‘tkazish atrofdagilarning hayoti va sog‘lig‘iga xavf solishini yodda tutishga chaqirilmoqda.

Avvalroq, havo sharlari giyohvand moddalar sotuvchilari tomonidan niqob sifatida ishlatilayotgani xabar qilingandi. Jinoyatchilar ularga taqiqlangan moddalarni joylab, yo‘llarda sotgan.

Source: podrobno.uz