Qo‘qonda 20 may kuni soat 16:00 atrofida Amir Temur ko‘chasida voyaga yetmagan haydovchi boshqaruvidagi “Malibu 2” rusumli avtomobil yo‘lning belgilangan joyidan o‘tayotgan uch nafar 10 yoshli qizchani urib yubordi.

Farg‘ona viloyati IIB matbuot xizmati xabariga ko‘ra, voyaga yetmagan shaxs yo‘l harakati vaziyatini baholay olmay, piyodalar o‘tish joyida uch nafar qizchani bosib ketgan.

Barcha uch bola turli darajadagi tan jarohatlari bilan shifoxonaga yotqizilgan. Shifokorlarning sa’y-harakatlariga qaramay, jabrlanganlardan biri vafot etdi.

Haydovchilik guvohnomasiga ega bo‘lmagan o‘smirga nisbatan Jinoyat kodeksining 266-moddasi 2-qismi (Transport vositalari harakati xavfsizligi yoki ulardan foydalanish qoidalarini buzish) bo‘yicha jinoyat ishi qo‘zg‘atilgan. Gumonlanuvchi ushlanib, tergov harakatlari davom etmoqda.

Viloyat IIB ota-onalarga murojaat qilib, bolalar ustidan nazoratni kuchaytirishga va ularni hech qachon avtomobil boshqarishiga yo‘l qo‘ymaslikka chaqirdi, aks holda bunday qonunbuzarliklar ko‘pincha qaytarib bo‘lmas yo‘qotishlarga olib kelishini ta’kidladi.

Source: podrobno.uz