Ijtimoiy tarmoqlarda O‘zbekiston maktablarida sinf rahbarlari o‘quvchilardan yozgi ta’til davri uchun kafolat xatlari yig‘ishayotgani haqida xabarlar tarqaldi.

Ba’zi xabarlarda aytilishicha, maktab o‘quvchilari soat 20:00 dan keyin ko‘chaga chiqmaslik, kompyuter klublari va ko‘ngilochar joylarga kattalar ruxsatisiz bormaslik, yo‘l harakati va yong‘in xavfsizligi qoidalariga rioya qilish majburiyatini olgan.

Maktabgacha va maktab ta’limi vazirligi ushbu vaziyatga munosabat bildirdi. Vazirlik matbuot xizmati bunday ko‘rsatmalar berilmaganligini ma’lum qildi.

Vazirlikning ta’kidlashicha, hech qanday hududiy bo‘linma yoki ta’lim muassasasiga bunday mazmundagi ko‘rsatma yoki tavsiyalar yuborilmagan.

Agar bunday amaliyot mavjud bo‘lsa, u vazirlik topshirig‘i bilan bog‘liq emas va faqat ayrim maktab yoki sinf rahbarlarining tashabbusi bo‘lishi mumkin.

Source: podrobno.uz