O‘zbekistonda yangi sport tuzilmasi — “Olimpiyaga kirmaydigan sport turlari konfederatsiyasi”ni tashkil etish rejalashtirilmoqda.

Tegishli hukumat qarori loyihasi normativ-huquqiy hujjatlar muhokamasi portalida e’lon qilindi.

Hujjatga ko‘ra, yangi tuzilma “O‘zbekiston Olimpiyaga kirmaydigan sport turlari konfederatsiyasi” deb nomlanadi. U Olimpiya, Paralimpiya va Osiyo o‘yinlari dasturlariga kirmaydigan sport turlari bo‘yicha federatsiyalar va assotsiatsiyalarni birlashtirishi kerak.

Loyiha mualliflarining fikriga ko‘ra, konfederatsiya davlat va sport tashkilotlari o‘rtasida bog‘lovchi bo‘g‘in bo‘lishi kerak.

Loyihada shuningdek, murabbiylar va sportchi-o‘quvchilarning yagona elektron bazasini yaratish nazarda tutilgan. Uni 2026 yil qishigacha ishga tushirish rejalashtirilgan.

Konfederatsiya xalqaro tashkilotlar bilan hamkorlik qilish, grantlar va xususiy investitsiyalarni jalb qilish, shuningdek, sport klublarida marketing va menejmentni rivojlantirish imkoniyatiga ega bo‘ladi.

Olimpiyaga kirmaydigan sport turlari bo‘yicha O‘zbekiston terma jamoalari murabbiylari Sport vazirligi bilan kelishilgan holda tayinlanadi.

2027 yilda tuzilma faoliyatini yo‘lga qo‘yish va sport tadbirlarini o‘tkazish uchun davlat byudjetidan 5 milliard so‘mgacha mablag‘ ajratilishi mumkin. Konfederatsiyani Toshkentning Mirzo Ulug‘bek tumanida joylashtirish rejalashtirilgan.

Source: podrobno.uz