Toshkent metropolitenini yanada tez va qulay transport tizimiga aylantirish maqsadida hukumat yangi rejalarni tasdiqladi. Prezident qaroriga ko‘ra, 2030 yilga borib metroning kunlik yo‘lovchi oqimi 1,8 million kishiga yetkazilishi, bekatlar soni 79 taga, umumiy uzunligi esa 103 kilometrga oshirilishi rejalashtirilgan.

Poyezdlar harakati oralig‘ini 2-3 daqiqagacha qisqartirish ko‘zda tutilgan. Bu yo‘lovchilar uchun kutish vaqtini sezilarli darajada kamaytiradi va metrodan foydalanishni yanada qulay qiladi.

2028 yil oxirigacha bekatlar va o‘tish yo‘laklarida savdo avtomatlari hamda kichik savdo nuqtalari o‘rnatilishi mumkin. Shuningdek, bekatlar yonida “Park & Ride” tizimi joriy etiladi, bu haydovchilarga mashinalarini metro yonida qoldirib, jamoat transportida yo‘lini davom ettirish imkonini beradi.

To‘lov tizimida ham o‘zgarishlar kutilmoqda. 2027 yil 1 yanvardan boshlab yo‘lkira narxi masofaga qarab belgilanadi. Shu bilan birga, ayrim toifadagi yo‘lovchilar uchun imtiyozlar, shuningdek, bir kunlik, haftalik va oylik abonementlar joriy etiladi.

Eslatib o‘tamiz, 8 may kuni Toshkent metropoliteni bir sutkada 1,1 milliondan ortiq yo‘lovchiga xizmat ko‘rsatib, yangi rekord o‘rnatgan edi.

Source: podrobno.uz