O‘zbekistonning maishiy texnika ishlab chiqaruvchisi Premier Electronics va suriyalik distribyutor Kalash Trading Company LTD o‘rtasida umumiy qiymati 2 million AQSh dollariga teng bo‘lgan eksport shartnomasi imzolandi. Hujjat O‘zbekiston Savdo-sanoat palatasi ko‘magida o‘tkazilgan ishbilarmonlik muzokaralari yakunida rasmiylashtirildi.

Suriya kompaniyasi delegatsiyasi tashrif davomida Premier Electronics korxonasining ishlab chiqarish quvvatlari bilan tanishdi. Mehmonlar muzlatgichlar, kir yuvish mashinalari, televizorlar va konditsionerlar ishlab chiqariladigan sexlarni borib ko‘rdi.

Tomonlar hamkorlik istiqbollari va O‘zbekiston maishiy texnikasining Suriya bozoriga muntazam yetkazib berilishini tashkil etish masalalarini muhokama qildi. Imzolangan kelishuv keng turdagi mahsulotlar eksportini nazarda tutadi.

Savdo-sanoat palatasi matbuot xizmati xabariga ko‘ra, ushbu shartnomaning amalga oshirilishi mahalliy mahsulotlarning Yaqin Sharq bozorlaridagi ishtirokini kengaytirish va Made in Uzbekistan brendining xalqaro miqyosdagi mavqeini mustahkamlashga qaratilgan.

Source: kun.uz