Farg‘ona viloyati soliq organlari tomonidan soxta qo‘shilgan qiymat solig‘i (QQS) yordamida noqonuniy keshbek olishga urinish aniqlandi. Sun’iy ravishda yaratilgan QQSning umumiy summasi 125,4 milliard so‘mni tashkil etdi.

Viloyat soliq boshqarmasi xabariga ko‘ra, qoidabuzarlik yashirin iqtisodiyotga qarshi kurash doirasida o‘tkazilgan tahlil jarayonida aniqlangan.

Ma’lum bo‘lishicha, Farg‘onalik T.Z. ismli fuqaro “E.F.F.” va “F.E.O.Z.” kompaniyalarini ro‘yxatdan o‘tkazgan. Joriy yilning may oyida ushbu firmalar Termizda ro‘yxatdan o‘tgan “T.B.S.E.” kompaniyasidan 1,2 trillion so‘mlik un va sariyog‘ sotib olganliklari haqida elektron schyot-fakturalar rasmiylashtirgan.

May oyi uchun QQS bo‘yicha soliq hisobotlari tekshirilganda va kompaniyalarning yuridik manzillaridagi omborlar o‘rganilganda, tovarlar aslida yetkazib berilmagani va tomonlar o‘rtasida pul hisob-kitoblari amalga oshirilmagani ma’lum bo‘ldi.

Tezkor choralar natijasida “E.F.F.” va “F.E.O.Z.” kompaniyalarining QQS to‘lovchisi guvohnomalari vaqtincha to‘xtatildi. Tashkilotlar aniqlashtirilgan soliq deklaratsiyalarini taqdim etdi va 125,4 milliard so‘mlik soxta QQS bekor qilindi.

Ushbu sxema keyinchalik ijtimoiy tarmoqlar orqali soxta fiskal cheklarni sotish va noqonuniy keshbek olish uchun tashkil etilgani xabar qilinmoqda.

Ish bo‘yicha materiallar huquqni muhofaza qiluvchi organlarga topshirildi.

Source: uznews.uz