18-iyun kuni Farg‘ona tumani jinoyat sudida 24 yoshli B.M. ismli fuqaroga nisbatan jinoyat ishi ko‘rib chiqildi. U Rossiya-Ukraina urushida Rossiya tomonida yollanma sifatida jang qilgan va O‘zbekistonga noqonuniy qaytganlikda ayblangan.

Sud hujjatlariga ko‘ra, B.M. 2021-2022 yillarda Rossiyada mehnat faoliyati bilan shug‘ullangan. 2022-yil mart oyida u 32 gramm geroin bilan qo‘lga olinib, Rossiya sudi tomonidan 9 yilga ozodlikdan mahrum etilgan.

Jazoni o‘tash davomida B.M. Rossiya harbiy tashkilotlari vakillarining taklifiga rozilik berib, Ukrainadagi jangovar harakatlarda ishtirok etishga rozi bo‘lgan. U 2023-yil mayidan oktabrigacha Lugansk shahrida Rossiya tomonida jang qilgan.

Janglar vaqtida B.M. minani bosib olib, o‘ng oyog‘idan og‘ir jarohat olgan. Natijada uning o‘ng boldiri amputatsiya qilingan va bu umumiy mehnat qobiliyatining 33 foizdan ortiq yo‘qotilishiga sabab bo‘lgan.

2026-yil 28-aprelda B.M. Qirg‘izistondan O‘zbekistonga noqonuniy ravishda chegarani kesib o‘tgan vaqtda chegarachilar tomonidan ushlangan. Uning telefonidan Rossiya harbiy formasidagi foto va videolar topilgan.

Sudda B.M. o‘z aybiga iqror bo‘lib, pushaymonligini bildirgan. U ikkinchi guruh nogironi ekani, oilasining yagona boquvchisi ekani va o‘z ixtiyori bilan qaytgani kabi yengillashtiruvchi holatlar inobatga olingan.

Sud B.M.ni Jinoyat kodeksining 154-moddasi (Yollanish) va 223-moddasi (Noqonuniy chegara kesib o‘tish) bilan aybdor deb topib, 3 yil 6 oy ozodlikni cheklash jazosini tayinlagan. Mahkum uyini faqat ish yoki o‘qish uchun tark etishi mumkin va har oyda ichki ishlar bo‘limida ro‘yxatdan o‘tishi shart.

Source: www.gazeta.uz