Ichki ishlar vaziri o‘rinbosari Ramazon Ashropov matbuot anjumanida ma’lum qilishicha, yil boshidan buyon xizmat vazifasini bajarish chog‘ida 18 nafar ichki ishlar organlari xodimi halok bo‘lgan, yana 78 nafari turli xavfli vaziyatlarni bartaraf etishda jarohat olgan.

Shu davr mobaynida ichki ishlar organlari xodimlari 136 marta taklif qilingan poralarni rad etib, ushbu faktlar bo‘yicha belgilangan tartibda xabar berishgan. Shuningdek, ular 125 ming ommaviy tadbirning 70 milliondan ortiq ishtirokchilari xavfsizligini ta’minlagan.

Bundan tashqari, mamlakatda oldini olish mumkin bo‘lgan 14 342 ta jinoyat qayd etilgan, bu o‘tgan yilning shu davriga nisbatan 2 309 taga kamdir.

Ayollar tomonidan sodir etilgan jinoyatlar soni 27,7 foizga, yoshlar ishtirokidagi jinoyatlar 25,7 foizga, ilgari sudlangan shaxslar tomonidan 6,9 foizga, ishsiz fuqarolar tomonidan esa 30,8 foizga kamaygan.

Ichki ishlar organlari xodimlarining tashabbusi bilan 19 755 ta jinoyat aniqlangan, bu o‘tgan yilning birinchi yarmiga nisbatan 31 foizga ko‘pdir.

Giyohvand moddalarning noqonuniy aylanishi faktlari bo‘yicha 8 653 ta jinoyat ishi qo‘zg‘atilgan, 2 tonna 733 kg taqiqlangan moddalar, jumladan 52 kg dan ortiq sintetik giyohvand moddalar, shuningdek 2 million 651 ming dona kuchli ta’sir qiluvchi preparatlar musodara qilingan.

Tezkor bo‘linmalar tergov va suddan yashiringan 5 010 kishini qo‘lga olgan. Bundan tashqari, bedarak yo‘qolgan 2 633 kishi topilib, oilalariga qaytarilgan.

IIV ma’lumotlariga ko‘ra, olti oy davomida 5 778 mahallada jinoyat qayd etilmagan, bu ularning umumiy sonining 64 foizini tashkil qiladi. Yana 2 738 mahalla (30,4 foiz) “sariq” toifaga, 476 tasi (5,3 foiz) esa “qizil” toifaga kiritilgan.

Hisobot davrida IIV tizimiga 200 mingdan ortiq murojaat kelib tushgan. Hududiy ichki ishlar organlariga kelib tushgan 184 393 murojaatdan 146 170 tasi ijobiy hal qilingan, yana 14 623 tasi huquqiy tushuntirishlar berish orqali tartibga solingan.

Source: uznews.uz