Namangan viloyatida Sirdaryo daryosida cho‘kib ketgan erkakni qidirish ishlari davom etmoqda. Favqulodda vaziyatlar boshqarmasi xodimlari suv osti va suv yuzasida qidiruv olib bormoqda.

Viloyat favqulodda vaziyatlar boshqarmasi ma’lumotiga ko‘ra, 12 iyul kuni soat 18:26 da 112 raqamiga Farg‘ona viloyati Uchko‘prik tumani “Puchug‘oy” mahallasining 27 yoshli fuqarosi daryoda cho‘kib ketgani haqida xabar kelib tushgan.

Fojia Namangan tumani “Oq yer” mahallasi hududidan oqib o‘tuvchi Sirdaryo qismida yuz bergan. Dastlabki ma’lumotlarga ko‘ra, erkak ehtiyotsizlik tufayli suv ostiga ketgan.

Hozirda viloyat favqulodda vaziyatlar boshqarmasi maxsus qidiruv-qutqaruv otryadi g‘avvoslari daryo tubini tekshirmoqda, yong‘in-qutqaruv bo‘linmalari xodimlari esa suv yuzasida qidiruv ishlarini olib bormoqda.

“Qidiruv ishlari davom etmoqda, qo‘shimcha ma’lumotlar ular tugagandan so‘ng taqdim etiladi”, — deyishdi idorada.

Avvalroq Navoiy viloyatida Zarafshon daryosida uch o‘smir cho‘kib ketgan edi. Ularning jasadlari bir necha kundan keyin topilgan.

Source: podrobno.uz