O‘zbekiston Markaziy banki huzurida Islom moliyasi bo‘yicha Kengash tashkil etildi. Ushbu yangi kollegial organ islom moliyalashtirishini rivojlantirishni muvofiqlashtiradi va islom tamoyillari asosida faoliyat yurituvchi banklar, mikromoliya tashkilotlari va boshqa moliya institutlari uchun yagona standartlarni ishlab chiqadi.

Kengashning asosiy vazifalari qatoriga xalqaro talablar va mahalliy amaliyotni hisobga olgan holda islom moliyasining milliy standartlarini ishlab chiqish, tartibga solish va nazorat bo‘yicha tavsiyalar tayyorlash, banklar va mikromoliya tashkilotlariga maslahat berish, shuningdek, Markaziy bank nomidan global standartlarni ishlab chiqish bilan shug‘ullanuvchi AAOIFI xalqaro tashkiloti ishida ishtirok etish kiradi. Kengash har yili Markaziy bank boshqaruviga o‘z faoliyati to‘g‘risida hisobot taqdim etadi.

Kengash tarkibiga besh mutaxassis – islom huquqi bo‘yicha to‘rt ekspert va islom moliyasi sohasidagi bir texnik ekspert kirdi. Rais etib O‘zbekiston musulmonlari idorasi Fatvo markazi bosh mutaxassisi Saidjamol Masayitov, uning o‘rinbosari etib esa Fatvo markazi bosh mutaxassisi Muhammadayubxon Xomidov tayinlandi. Kengash a’zolari, shuningdek, Fatvo markazi mutaxassislari Hikmatilla Toshtemirov va Abdulatif Tursunov, hamda Orient Audit Group audit kompaniyasining boshqaruvchi sherigi Axrorjon Sadullayevdir.

Kengash a’zolarining aksariyati islom huquqi sohasida ko‘p yillik tajribaga ega, O‘zbekiston musulmonlari idorasi Ulama kengashi tarkibiga kiradi va islom moliyasi bo‘yicha AAOIFI xalqaro sertifikatlariga ega. Texnik ekspert Axrorjon Sadullayev bank va moliya sohasida 20 yildan ortiq ishlagan, avval Markaziy bank, “Aloqabank”, KDB Bank Uzbekistan, shuningdek, KPMG, Ernst & Young va Grant Thornton kabi xalqaro audit kompaniyalarida turli lavozimlarda faoliyat yuritgan.

Source: podrobno.uz