Toshkent va Toshkent viloyatida Davlat xavfsizlik xizmati (DXS) hamda bojxona va ichki ishlar organlari xodimlari tomonidan o‘tkazilgan “Xavfsiz va sog‘lom mamlakat” operativ-profilaktik tadbirlari doirasida ikkita yirik narkotik jinoyati fosh etildi.

Birinchi hodisa poytaxtda qayd etildi. DXS va bojxona xizmati xodimlari ilgari sudlangan, 1983-yilda tug‘ilgan Yashnobod tumani fuqarosini Yakkasaroy tumanida qo‘lga oldi. U G‘arbiy Afrikadagi Syerra-Leone davlatidan kelgan xalqaro kuryer posilkasini olayotgan vaqtda ushlangan. Posilkani tekshirishda avtomobil ehtiyot qismlari ichida yashirilgan 728 gramm kokain topildi.

Gumonlanuvchining yashash joyida o‘tkazilgan tintuvda zip-paketlardagi kukun moddalar va narkotik saqlagan qandolatchilik mahsulotlari ham olindi. Unga nisbatan Jinoyat kodeksining 246-moddasi 2-qismi bilan jinoyat ishi qo‘zg‘atilib, tergov davom etmoqda.

Ikkinchi jinoyat Toshkent viloyatining Bo‘stonliq tumanida DXS va ichki ishlar organlari hamkorligida ochildi. Mutaxassislar 1971-yilda tug‘ilgan mahalliy fuqaro G‘ilvasoy qishlog‘i yaqinidagi tog‘ yonbag‘irlarida noqonuniy narkotik o‘simliklar plantatsiyasini tashkil qilganini aniqladi. Tekshiruvda 17600 tup ko‘knori va to‘qqiz tup nasha olib tashlandi.

Erkakning uyidan quritilgan ko‘knori boshchalari va maydalangan quruq narkotik modda ham topildi. Unga nisbatan Jinoyat kodeksining 270-moddasi 2-qismi “v” bandi hamda 25,273-moddalari 6-qismi “a” bandi bilan jinoyat ishi qo‘zg‘atilgan. Tergov harakatlari davom etmoqda.

Source: podrobno.uz