Farg‘ona viloyatida huquq-tartibot idoralari xodimlari besh nafar yoshni Qo‘va tumani fuqarosidan 8 million so‘m undirishda gumon qilib ushladi. Tergov ma’lumotlariga ko‘ra, ular erkakni kaltaklab, videoga tushirgan va yozuvlarni qarindoshlariga tarqatish bilan tahdid qilgan.

Viloyat IIB ma’lumotlariga ko‘ra, 14 iyun kuni gumonlanuvchilar erkakni Farg‘ona shahridagi “Beshbola” mahallasi hududidagi karerga olib chiqib ketgan. U yerda uni kaltaklab, mobil telefonlariga kompromat holatda videoga olgan.

Keyin guruh a’zolari jabrlanuvchiga, agar oldindan kelishilgan pulni bermasa, yozuvlarni uning yaqinlariga yuborib, sharmanda qilish bilan tahdid qilgan. Huquq-tartibot xodimlari gumonlanuvchilarni 2 million so‘mni olayotgan vaqtida qo‘lga olgan.

Hozirda hodisa yuzasidan hujjatlar rasmiylashtirilmoqda va tergovgacha tekshiruv o‘tkazilmoqda.

Avvalroq Xiva tumanida bir erkak ayoldan 16 million so‘m talab qilib, uning shaxsiy fotosuratlari va videolarini e’lon qilish bilan tahdid qilgani uchun ushlangani xabar qilingan edi.

Source: podrobno.uz