Toshkentda Damira Beverages Enterprise nomli zamonaviy ichimliklar ishlab chiqarish kompleksi ishga tushirildi. Ushbu korxona Markaziy Osiyodagi eng yirik va ilg‘or komplekslardan biri bo‘lib, atigi 12 oy ichida qurib bitkazilgan.
Yangi zavod 300 kishini ish bilan ta’minlaydi, shuningdek, logistika, xomashyo yetkazib berish, qadoqlash, xizmat ko‘rsatish va savdo kabi qo‘shni sohalarda 3000 tagacha ish o‘rinlari yaratilishiga hissa qo‘shadi.
Korxona to‘liq sikl ishlab chiqarishga ega bo‘lib, xomashyo saqlash va tayyorlash, qaynatish sexi, fermentatsiya, kuplaj, filtrlash, quyish liniyalari, sifat nazorati laboratoriyasi va ombor infratuzilmasini o‘z ichiga oladi.
Ishlab chiqarish yetakchi jahon ishlab chiqaruvchilarining uskunalari bilan jihozlangan. Qaynatish sexida GEA/Huppmann uskunalari o‘rnatilgan bo‘lib, texnologik jarayonlarning yuqori aniqligini ta’minlaydi. Shuningdek, to‘rtta avtomatlashtirilgan KHS quyish liniyasi mavjud.
Multiformat liniyalar shisha, alyuminiy banka, PET shisha va keglarda mahsulot chiqarish imkonini beradi. Bu pivo, alkogolsiz ichimliklar, solodli ichimliklar, energetik ichimliklar va ichimlik suvi kabi keng assortimentni ishlab chiqarishga yo‘l ochadi.
Sifat va xavfsizlikka alohida e’tibor qaratilgan. Zamonaviy kimyo laboratoriyasi va avtomatlashtirilgan monitoring tizimlari “daladan stolgacha” tamoyili bo‘yicha har bir bosqichda sifatni nazorat qiladi.
Kompleks resurslardan oqilona foydalanish, energiya sarfini kamaytirish va ishlab chiqarish jarayonlarining avtonomligini oshirishga qaratilgan ilg‘or muhandislik tizimlari bilan jihozlangan. Quyosh panellari elektr energiyasini 10% dan ortiq tejash imkonini beradi. Hududda 5300 tup ko‘chat ekilgan va 8150 m² maysazor barpo etilgan.
Ochilish marosimida ishlab chiqarish bo‘ylab ekskursiya, rasmiy qism, taqdirlash, konsert dasturi va bayram salyuti bo‘lib o‘tdi.
Damira Beverages Enterprise bosh direktori Mairbek Sageyevning ta’kidlashicha, korxona ilg‘or texnologiyalar, yuqori darajadagi avtomatlashtirish va qat’iy sifat nazoratini birlashtiradi. Uning so‘zlariga ko‘ra, asosiy maqsad yuqori sifatli mahsulot ishlab chiqarish va mamlakat iqtisodiyoti, hamkorlar, xodimlar va O‘zbekiston kelajagi uchun uzoq muddatli qiymat yaratishdir.
Sergeli tumani hokimi Davron Ismatov loyihaning ahamiyatini ta’kidlab, yangi korxona sanoat salohiyatini oshirish, yangi ish o‘rinlari yaratish va mahalliy ishlab chiqarishni rivojlantirishga hissa qo‘shishini aytdi.
Damira Beverages Enterprise “Baltika” mahsulotlarining O‘zbekistondagi rasmiy litsenziati va importyori hisoblanadi.
Source: uznews.uz