O‘zbekiston hukumati go‘sht narxlarini ichki bozorda ushlab turish maqsadida joriy qilingan aviaimtiyozlarni yil oxirigacha uzaytirishga qaror qildi. Bu haqda prezident raisligida o‘tkazilgan videoselektor yig‘ilishida ma’lum bo‘ldi.

Eslatib o‘tamiz, aprel oyidan boshlab mol va qo‘y go‘shti import qiluvchilarga mahsulotni havo transportida yetkazib berish xarajatlarining 50 foizi, kilogrammiga 0,8 dollardan oshmagan miqdorda kompensatsiya qilinmoqda. Dastlab bu chora 1 avgustgacha amal qilishi kerak edi.

Yig‘ilishda shuningdek, yil oxirigacha mamlakatga 100 ming bosh qoramol va 150 ming bosh qo‘y va echki import qilish rejalashtirilgani bildirildi. Sohani qo‘llab-quvvatlash uchun may oyida Qishloq xo‘jaligi jamg‘armasidan chorvachilik loyihalariga 1 trillion so‘m yo‘naltirilgan bo‘lsa, qo‘shimcha ravishda Tiklanish va taraqqiyot jamg‘armasidan yana 50 million dollar ajratiladi.

Ushbu mablag‘lar hisobidan tadbirkorlar yillik 10 foizli imtiyozli kreditlar olishlari mumkin: chorvachilik komplekslarini yaratish uchun 5 milliard so‘mgacha va nasldor chorvachilikni rivojlantirish uchun 20 milliard so‘mgacha. Kreditlar 10 yil muddatga, to‘rt yillik imtiyozli davr bilan beriladi.

Source: podrobno.uz