Prezident Shavkat Mirziyoyev 22-iyul kuni Toshkent-Samarqand avtomagistrali qurilishi boshlanishiga bag‘ishlangan marosimda bir qator yirik yo‘l loyihalari haqida ma’lumot berdi. Xususan, Urganch va Xiva o‘rtasidagi ilk pullik avtomobil yo‘li avgust oyida foydalanishga topshirilishi rejalashtirilmoqda.
Davlat rahbari Xivani Urganch bilan bog‘laydigan 35 kilometrlik pullik yo‘l qurilishi allaqachon boshlanganini va kelasi oy foydalanishga topshirilishini ta’kidladi. Ushbu magistral turistik infratuzilmaning muhim qismiga aylanib, mahalliy va xorijiy sayyohlarga xizmat qiladi.
Avtomobil yo‘llari qo‘mitasi ma’lumotlariga ko‘ra, 15-iyul holatiga yo‘l qurilishi 80 foizga bajarilgan. Loyiha doirasida 15 ta yangi ko‘prik, bitta tonnel, beshta yerosti o‘tish yo‘lagi va 101 ta suv o‘tkazish inshooti qurilgan. Yo‘lning tuproq ishlari va ostki qatlam uchun asos qurish ishlari to‘liq yakunlangan, 25 kilometr qismida birinchi qatlam asfalt qoplamasi yotqizilgan.
Yangi magistral mavjud D215 Xiva shossesiga muqobil bo‘lib, Urganch va Xiva o‘rtasidagi safar vaqti 60 daqiqadan 17 daqiqagacha qisqarishi kutilmoqda. Yo‘lning o‘tkazuvchanlik qobiliyati kuniga 20 mingdan ortiq avtomobilni tashkil etadi. Loyiha qiymati 120 million dollarga baholangan.
Prezident, shuningdek, Toshkent-Andijon pullik yo‘li bo‘yicha xalqaro tender yakunlanish arafasida ekanligini ma’lum qildi. 314 kilometrlik yo‘lning birinchi bosqichi 171 kilometrni tashkil etib, qiymati 3,66 milliard dollarga baholangan. Loyiha Jahon banki ko‘magida amalga oshirilmoqda.
Toshkent-Chorvoq pullik yo‘li loyihasi bo‘yicha xususiy sherik aniqlanmoqda. 52 kilometrlik yo‘l uch yil ichida qurilishi rejalashtirilgan. Loyiha bo‘yicha Qatarning Protocol Capital Group va Janubiy Koreyaning Korea Expressway Corporation bilan dastlabki kelishuvlarga erishilgan.
Korrupsiyaga qarshi kurashish agentligi Urganch-Xiva loyihasini o‘rganayotgani, mutaxassislar esa buyurtmachi, pudratchi va yetkazib beruvchi vazifalarining bir idorada jamlanishi manfaatlar to‘qnashuviga olib kelishi mumkinligini ta’kidlagan.
Source: www.gazeta.uz