Toshkentda “Yashil to‘lqin” tizimi kengaytirilmoqda — unga Kichik halqa yo‘lining yana bir qismi ulandi. Bu haqda Yo‘l harakati markazi xabar berdi.

Yangi uchastka Bog‘ibuston ko‘chasidan “Chilonzor” metro bekasigacha bo‘lgan 1,7 kilometrlik yo‘lni o‘z ichiga oladi. Bu yerda beshta svetofor sinxronlashtirildi, endi haydovchilar kamroq to‘xtashga majbur bo‘ladi.

Tizim kun bo‘yi va har ikki yo‘nalishda ishlaydi. Markaz ma’lumotlariga ko‘ra, ilgari bu yo‘lni bosib o‘tish uchun o‘rtacha 5 daqiqa kerak bo‘lgan. Endi esa o‘rtacha vaqt 2 daqiqa 45 soniyani tashkil etmoqda — bu taxminan 45 foizga tejash degani.

Soatiga 40–60 kilometr tezlikda harakatlanayotgan avtomobillar bir nechta chorrahalarni deyarli to‘xtamasdan o‘tishi mumkin.

Eslatib o‘tamiz, avvalroq xuddi shunday tizim Buyuk Ipak Yo‘li ko‘chasida ishga tushirilgan bo‘lib, u yerda 13 ta chorrahadagi svetoforlar sinxronlashtirilgan edi. Hozirda “Yashil to‘lqin” umumiy uzunligi 5,7 kilometr bo‘lgan ikki uchastkada ishlamoqda va 18 ta tartibga solinadigan chorrahalarni qamrab olgan. O‘rtacha harakat vaqti uchdan bir qismga qisqargan.

Yo‘l harakati markazi boshqa ko‘chalarda ham tizimni joriy etish ustida ish olib borayotganini, bu harakatni yanada tez va qulay qilishini ta’kidladi.

Source: podrobno.uz