Andijon xalqaro aeroporti tarixida ilk bor og‘ir yuk samolyoti Boeing 747-400F ni qabul qildi. Samolyot Yevropadan 160 dan ortiq nasldor qoramolni O‘zbekistonga yetkazdi.

Challenge Air Cargo aviakompaniyasining reysi Belgiyaning Lyej aeroportidan mahalliy vaqt bilan erta tongda, soat 03:13 da yetib keldi. Samolyot 83,3 tonna yuk olib kelgan — bu simmental va golshtin zotli sigirlar bo‘lib, ular sut va go‘sht yo‘nalishida yuqori mahsuldorligi bilan tanilgan.

Yukni tushirish, veterinariya nazorati va hayvonlarni jo‘natishning barcha bosqichlari tezkor va biologik xavfsizlik talablariga rioya qilgan holda amalga oshirildi. Tekshiruvdan so‘ng qoramollar maxsus transportga yuklanib, belgilangan manzilga yo‘l oldi.

Uzbekistan Airports kompaniyasi bu hodisa mintaqa uchun muhim ekanini ta’kidladi. Bunday turdagi samolyotni qabul qilish Andijon aeroporti yirik va murakkab yuklar, jumladan, xalqaro standartlar bo‘yicha tirik hayvonlarni tashishga tayyor ekanini tasdiqlaydi.

Eslatib o‘tamiz, avvalroq Fitch Ratings xalqaro reyting agentligi Uzbekistan Airports kompaniyasining uzoq muddatli kredit reytingi bo‘yicha prognozni “barqaror”dan “ijobiy”ga yaxshilagan va reytingni “BB” darajasida tasdiqlagan edi.

Source: podrobno.uz