Namangan viloyatining Yangiqo‘rg‘on tumanida bugun tushdan keyin qurilish materiallari bozorida yirik yong‘in kelib chiqdi. Voqea joyidan qora tutun ko‘tarilgani aks etgan videolar ijtimoiy tarmoqlarda tez tarqaldi.

Favqulodda vaziyatlar vazirligi ma’lumotiga ko‘ra, “Mingchinor” mahallasidagi bozorda yong‘in haqida xabar yagona “112” xizmatiga soat 13:46 da kelib tushgan. Olov qurilish materiallari sotiladigan savdo rastalarini qamrab olib, qo‘shni pavilyonlarga tarqalish xavfini tug‘dirgan.

Voqea joyiga FVVning yong‘in-qutqaruv bo‘linmalari maxsus texnikalar bilan tezda yetib kelgan. Qo‘ng‘iroqdan 12 daqiqa o‘tib, soat 13:58 da o‘t o‘chiruvchilar olovni mahalliylashtirishga muvaffaq bo‘lgan.

Hozirda bozor hududida yong‘inni to‘liq bartaraf etish va inshootlarni sug‘orish ishlari davom etmoqda. Favqulodda xizmatlarning dastlabki ma’lumotlariga ko‘ra, hodisa oqibatida hech kim jabrlanmagan, vaziyat mutaxassislar tomonidan to‘liq nazorat qilinmoqda. Yong‘in sabablari va zarar miqdori aniqlanmoqda.

Source: podrobno.uz