O‘zbekiston Markaziy banki tomonidan e’lon qilingan moliyaviy qamrov indeksiga ko‘ra, mamlakatda har uchinchi jismoniy shaxs qarz oluvchi bir vaqtning o‘zida bir nechta kreditni to‘laydi. Aniqrog‘i, bunday qarz oluvchilar ulushi 29 foizni tashkil etadi, har bir qarz oluvchiga o‘rtacha 1,7 ta amaldagi kredit to‘g‘ri keladi.

Markaziy bank ma’lumotlariga ko‘ra, mamlakatning voyaga yetgan aholisining 20 foizi banklarda amaldagi kredit hisob raqamiga ega, yana 7 foizi mikroqarz tashkilotlari xizmatlaridan foydalanadi. Kredit byurosi esa O‘zbekistonning voyaga yetgan aholisining 98 foizi to‘g‘risida ma’lumotga ega.

Markaziy bank, shuningdek, yangi chakana kreditlarning 80 foizi avtomatlashtirilgan kredit konveyeri orqali rasmiylashtirilishini ta’kidladi. Kredit mahsulotlarining mavjudlik indeksi 100 balldan 64 ballni, ulardan amalda foydalanish darajasi esa 47 ballni tashkil etdi.

Regulyator qarz oluvchilarning umumiy qarz yukini nazorat qilishni kuchaytirish, kreditorlar o‘rtasida ma’lumot almashinuvini tezlashtirish va mijozlarning to‘lov qobiliyatini baholashning aniqroq modellarini joriy etish niyatida.

Avvalroq xabar qilinganidek, so‘nggi bir yil ichida aholiga berilgan kreditlar hajmi 21,2 foizga o‘sib, 231 trillion so‘mga yaqinlashdi. Markaziy bank fuqarolarning qarzlarni o‘z vaqtida to‘lash qobiliyatidan xavotir bildirgan.

Source: podrobno.uz