2019-yildan buyon O‘zbekistonda 97,8 milliondan ortiq mobil qurilma IMEI-kodi ro‘yxatga olingan bo‘lib, ro‘yxatdan o‘tkazish uchun to‘langan umumiy summa 3 trillion so‘mdan oshdi.

Telekommunikatsiya tarmoqlarini boshqarish respublika markazi bo‘limi boshlig‘i Otabek Azimovning Gazeta.uz nashriga ma’lum qilishicha, bu to‘lovlar soliq maqomiga ega emas va tizimni saqlash, serverlarni yangilash, chekka hududlarda aloqani rivojlantirish hamda xodimlarga ish haqi to‘lashga yo‘naltiriladi.

Tizim ish boshlagan birinchi yili 47,6 million kod avtomatik va bepul ro‘yxatga olingan. Importyorlar ulushiga 30,4 million ro‘yxatdan o‘tgan kod (31,1%) to‘g‘ri keladi, jismoniy shaxslar — 19,03 million (19,5%), mahalliy ishlab chiqaruvchilar esa 779 ming (0,8%) kodni tashkil etadi.

Qurilmalar orasida smartfonlar yetakchilik qilmoqda (72,5 million). Brendlar bo‘yicha Samsung (35,5 million), Xiaomi (18,1 million), Nokia (7,7 million) va Apple (5,8 million) yetakchilardir.

Tizim faoliyati davomida 20,1 million kod bloklangan. Shu bilan birga, 7 yil ichida telefonlarning rasmiy importidan tushgan bojxona to‘lovlari 5 trillion so‘mdan oshdi.

UzIMEI tizimi mobil qurilmalarning qonuniy importi ulushini 93% ga yetkazishga imkon berdi, ularning 95% importyorlar tomonidan olib kiriladi. Bu Samsung va Xiaomi’ning rasmiy do‘konlarini ochishga turtki bo‘ldi. Apple’ning rasmiy do‘konini ochish bo‘yicha muzokaralar esa kompaniyaning maxfiylik siyosatidagi nuanslar tufayli 1 yildan ortiq davom etmoqda.

Fuqarolarning pasport ma’lumotlarini qora bozorda noqonuniy sotilishining oldini olish uchun qurilmalarni ro‘yxatdan o‘tkazish jarayoniga Face ID identifikatsiya tizimi majburiy joriy etilgan.

Source: podrobno.uz