Toshkentda 4-sentabr kuni bir sutka ichida 22 ta yo'l-transport hodisasi qayd etildi. Natijada to'rt kishi og'ir tan jarohatlari bilan kasalxonaga yotqizildi.

Yo'l harakati xavfsizligini ta'minlash markazi ma'lumotlariga ko'ra, shahar bo'ylab bir kunda 1 502 057 ta avtomobil harakatlangan. Shu vaqt ichida yo'l harakati qoidalarini buzishning 4 751 ta holati aniqlandi.

Jamoat transporti 1 228 158 yo'lovchini tashigan bo'lsa, metro xizmatidan 862 053 kishi foydalangan. Pik soatlarida shaharning oltita chorrahasida tirbandlik darajasi yetti ballga yetgan, yana bitta chorrahada esa bu ko'rsatkich oshib ketgan.

Yo'l harakatini barqarorlashtirish maqsadida svetoforlarning ish rejimi o'zgartirilib, yashil chiroq yonish vaqti uzaytirilgan. Muammoli uchastkalarga esa yo'l harakati xavfsizligi inspektorlari safarbar qilingan.

Vaziyat markazida transport oqimi real vaqt rejimida kuzatilmoqda. Ko'rilayotgan choralar tirbandliklarning oldini olish va yo'l harakati xavfsizligini ta'minlashga qaratilgan.

Eslatib o'tamiz, avvalroq Toshkent viloyatining Ohangaron tumanida Lacetti bilan to'qnashuvdan so'ng Isuzu rusumli yo'lovchi avtobusi ag'darilgan edi. Hodisada uch kishi jarohatlanib, shifoxonaga yotqizilgan.

Source: podrobno.uz