O‘zbekiston Vazirlar Mahkamasi qarori bilan davlat oliy ta’lim muassasalari talabalari o‘rtasida “Eng innovatsion g‘oya” respublika tanlovi o‘tkazilishi belgilandi. Tanlovning asosiy maqsadi – iqtidorli yoshlarning ilmiy-texnik salohiyatini qo‘llab-quvvatlash va ularning g‘oyalarini amaliy startaplarga aylantirish uchun moliyaviy rag‘batlantirishdir.

Tanlov har yili sentyabrdan dekabrgacha ikki bosqichda o‘tkaziladi. Birinchi bosqichda har bir davlat oliy ta’lim muassasasi o‘z talabalari orasida saralash o‘tkazadi. Ikkinchi, respublika bosqichida esa Innovatsion rivojlanish agentligi tomonidan 10 ta yo‘nalish bo‘yicha eng yaxshi g‘oyalar tanlab olinadi.

Birinchi bosqichda arizalar qabul qilish 10 sentyabrda boshlanadi va 10 oktyabrgacha davom etadi. Har bir talaba faqat bitta innovatsion g‘oya bilan ishtirok etishi mumkin. Loyihalar 100 ballik tizimda baholanadi: hakamlar hay’ati g‘oyaning ilmiy va innovatsion yangiligi, dolzarbligi, mavjud analoglardan farqi, xarajatlarning asosliligi hamda kutilayotgan natijalarni hisobga oladi.

Universitet bosqichida g‘oliblar uchun grantlar belgilangan: 1-o‘rin uchun 50 million so‘m, 2-o‘rin uchun 30 million so‘m, 3-o‘rin uchun 20 million so‘m. Respublika bosqichida esa mukofotlar ancha katta: mos ravishda 500 million, 300 million va 200 million so‘m. Bu mablag‘lar g‘oliblarning startap loyihalarini moliyalashtirishga yo‘naltiriladi.

Eslatib o‘tamiz, avvalroq O‘zbekiston mutaxassislari “Shunkor-88” nomli innovatsion dron-tutuvchini ishlab chiqishgan edi. Ushbu loyiha “Kelajak muhandislari” tanlovi doirasida Bilolxon Ismoilov rahbarligidagi jamoa tomonidan yaratilgan bo‘lib, uchuvchisiz apparatlarga qarshi kurashish uchun mo‘ljallangan.

Source: podrobno.uz