Samarqand shahrida 16-sentabr kuni 46-Butunjahon shaxmat Olimpiadasi bahslari rasman start oladi. Ushbu nufuzli turnirda O‘zbekistonning uchta erkaklar va uchta ayollar terma jamoasi ishtirok etadi. Birinchi turda erkaklar o‘rtasida birinchi jamoa Yamayka, ikkinchi jamoa Afg‘oniston, uchinchi jamoa esa Mali bilan kuch sinashadi. Ayollar turnirida esa O‘zbekiston jamoalariga Trinidad va Tobago, Togo hamda Tanzaniya raqiblik qiladi.
Erkaklar o‘rtasidagi birinchi terma jamoa safida ilk turda Nodirbek Abdusattorov, Nodirbek Yoqubboyev, Shamsiddin Vohidov va Muhiddin Madaminovlar ishtirok etadi. Javohir Sindarov esa birinchi o‘yinni o‘tkazib yuboradi. Ayollar birinchi jamoasida Gulruhbegim Tohirjonova, Umida Omonova, Nilufarxon Imomqo‘ziyeva va Guldona Karimova bahsga kirishadi. Birinchi tur bahslari Toshkent vaqti bilan 15:00 da boshlanadi.
O‘zbekistonning birinchi jamoasi Yamayka bilan kuch sinashadi. Doskalardagi juftliklar quyidagicha: O‘zbekiston birinchi va uchinchi doskalarda qora donalarda, ikkinchi va to‘rtinchi doskalarda esa oq donalarda o‘ynaydi. Ikkinchi jamoa Afg‘onistonga qarshi, uchinchi jamoa esa Mali bilan bahslashadi. Ayollar o‘rtasida birinchi jamoa Trinidad va Tobago, ikkinchi jamoa Togo, uchinchi jamoa Tanzaniya bilan to‘qnash keladi.
Ochiq turnirning birinchi turidagi boshqa diqqatga sazovor juftliklar orasida Iroq — AQSh, Hindiston — Tailand, Xitoy — Uganda, Farer orollari — Germaniya, Niderlandiya — Gonkong, Marokash — Ozarbayjon hamda Vengriya — Malta bahslari bor. Ayollar turnirida Hindiston Dominikan Respublikasi bilan, Tunis Gruziya bilan, Qozog‘iston Botsvana bilan, Zambiya Xitoy bilan, AQSh Andorra bilan, Iroq Ukraina bilan, Ozarbayjon esa Gvatemala bilan to‘qnash keladi.
Olimpiada starti oldidan yetakchi terma jamoalarning qaydnomadagi tartibi ham ma’lum bo‘ldi. Hindiston o‘z shaxmatchilarini reytingiga qarab joylashtirdi: birinchi doskada Rameshbabu Pragnanandxa qayd etilgan, undan keyin Arjun Erigaysi, Nihal Sarin, oxirgi — to‘rtinchi doskada esa amaldagi jahon chempioni Gukesh Dommaraju joy oldi. Vidit Gujrati beshinchi o‘yinchi sifatida ko‘rsatilgan. O‘zbekiston terma jamoasida sardor Rustam Qosimjonov Javohir Sindarovning reytingi biroz yuqoriroq bo‘lishiga qaramay, birinchi doskaga Nodirbek Abdusattorovni qo‘ydi. Qaydnomada undan keyin Sindarov, Nodirbek Yoqubboyev, Shamsiddin Vohidov va Muhiddin Madaminov keltirilgan. Shu bilan birga, birinchi turda Yamaykaga qarshi bahsda Sindarov qatnashmaydi.
AQSh o‘z shaxmatchilarini quyidagi tartibda e’lon qildi: Fabiano Karuana, Uesli So, Hans Nimann, Levon Aronyan va Avong Lyan. Xitoy jamoasidagi dastlabki besh pozitsiyani esa Din Lijen, Vey I, Yu Yan’i, Syuy Syan’yuy va Kun Syan’yuy egalladi. Partiyalar translyatsiyasini UzChess YouTube kanalida o‘zbek tilida hamda City Chess kanalida rus tilida tomosha qilish mumkin.
Samarqanddagi Butunjahon shaxmat olimpiadasi rekord darajadagi 400 ta jamoani birlashtiradi. O‘zbekiston o‘z maydonidagi ushbu turnirga favoritlardan biri sifatida kirib bormoqda, asosiy raqiblar esa AQSh, Hindiston va Xitoy bo‘ladi. Gazeta avvalroq “oltin”ga kimlar da’vogarlik qilayotgani hamda mamlakatning uchta erkaklar va uchta ayollar terma jamoasidan nimalar kutish mumkinligi haqida hikoya qilgandi. Bundan oldin biz O‘zbekiston terma jamoalarining Olimpiadaga tayyorgarligi haqida batafsil xabar bergandik. Gazeta mamlakatning uchta erkaklar jamoasi tarkibi bilan tanishtirgan va ayollar terma jamoasi kapitani Nafisa Mo‘minova bilan jamoaning maqsadlari hamda medallar uchun imkoniyatlari haqida suhbatlashgandi. Birinchi erkaklar terma jamoasi kapitani Rustam Qosimjonov ham tahririyatga bergan intervyusida O‘zbekistonning imkoniyatlari va Olimpiadaning asosiy favoritlari haqida so‘zlab, turnirga “vazmin optimizm” bilan yondashayotganini ta’kidlagan.
Source: www.gazeta.uz