Oʻzbekistonda alohida hollarda davlat sirlari bilan bogʻliq yoki alohida muhim toifadagi obyektlarni foydalanishga qabul qilish boʻyicha yangi tartib joriy etildi. Unga koʻra, bunday obyektlar tegishli komissiyalarning dalolatnomalari asosida toʻgʻridan toʻgʻri foydalanishga qabul qilinishi belgilandi.

Ushbu oʻzgarishlar Vazirlar Mahkamasining 2026-yil 12-oktabrdagi 560-sonli qarori bilan tasdiqlangan boʻlib, qurilishi tugallangan obyektlarni topshirish-qabul qilish hamda foydalanish uchun ruxsatnoma berish boʻyicha maʼmuriy reglamentga kiritildi. Mazkur huquqiy hujjat qurilish sohasidagi jarayonlarni yanada tartibga solishni koʻzda tutadi.

Qabul qilingan qarorga muvofiq, maxsus obyektlarni qabul qilish jarayonida Vazirlar Mahkamasining hujjatlari asosida Davlat qabul komissiyasi, buyurtmachilar tomonidan esa ishchi komissiya tuziladi. Obyektlar ushbu komissiyalarning rasmiy dalolatnomalarini rasmiylashtirish va tasdiqlash orqali foydalanishga topshiriladi.

Shuningdek, Davlat qabul komissiyasining qurilishi yakunlangan loyihalar doirasidagi obyektlarni qabul qilish toʻgʻrisidagi dalolatnomasi bevosita komissiya raisi tomonidan tasdiqlanishi belgilandi. Biroq, bu jarayonda qat'iy talablar ham qoʻyilgan boʻlib, unga koʻra dalolatnomani rasmiylashtirishdan oldin Davlat moliyaviy nazorat inspeksiyasi tomonidan majburiy nazorat oʻlchovi oʻtkazilishi shart.

Source: kun.uz