O‘zbekiston xalqaro ekspertlar iqlim loyihalarini tayyorlash hamda investitsiyalarni jalb qilishda ko‘maklashadigan beshta davlat qatoriga kirdi. Ushbu ish BMT Taraqqiyot dasturi ishtirokida boshlangan Climate Implementation Bridge (BRIDGE) tashabbusi doirasida amalga oshirilishi kutilmoqda.

Mazkur tashabbusning boshlangani 24-sentabr kuni Nyu-York shahrida o‘tgan Iqlim haftaligi davomida e'lon qilingan edi. Dastur BMTning iqlim o‘zgarishi bo‘yicha 31-konferensiyasi (COP31) raisligi homiyligida yuritilmoqda. O‘zbekiston bilan birgalikda ilk guruhga Efiopiya, Fiji, Indoneziya va Pokiston davlatlari kiritildi.

Jalb qilingan mutaxassislar loyihalarni ishlab chiqish hamda moliyalashtirish masalalarida ko‘mak berishni va'da qilmoqdalar. Yangilangan iqlim majburiyatlariga ko‘ra, respublika 2035-yilga borib YaIM birligiga nisbatan issiqxona gazlari chiqindilarini 2010-yil darajasiga nisbatan 50 foizga qisqartirishni niyat qilgan.

Tashabbus doirasida qayta tiklanuvchi energetikani rivojlantirish, energiya samaradorligini oshirish hamda suv resurslaridan oqilona foydalanish masalalariga e'tibor qaratiladi. Shuningdek, barqaror qishloq xo‘jaligi, chiqindilarni boshqarish va iqlim o‘zgarishiga moslashish ishlari ham rejalashtirilgan.

Milliy iqlim o‘zgarishi markazi turkiyalik mutaxassislar bilan onlayn uchrashuv o‘tkazib, amaliy qadamlarni muhokama qildi. Kelgusida xalqaro ekspertlar mahalliy mutaxassislar bilan birgalikda amaldagi dasturlarni tahlil qilib, yo‘l xaritasini tuzishi kutilmoqda.

Source: podrobno.uz