Toshkent xalqaro aeroporti yaqinida, Sergeli tumanining Qumariq mahallasida umumiy maydoni 17 ming kvadrat metrni tashkil etuvchi sun’iy ko‘l va favvora majmuasini barpo etish ishlari boshlab yuborildi. Ushbu tashabbus poytaxtning barcha tumanlarida jami 12 ta shunday sun’iy suv havzalarini tashkil etish bo'yicha keng ko'lamli loyihaning tarkibiy qismi ekani ma'lum qilindi.

Rasmiy idoralarning ta'kidlashicha, mazkur yangi suv havzasi hududdagi chang miqdorini kamaytirish, havoni namlantirish hamda atrof-muhitda qulay mikroiqlimni shakllantirishga xizmat qilishi kutilmoqda. Shuningdek, loyiha doirasida ko‘l atrofidagi 5 gektarlik hududda keng ko'lamli obodonlashtirish ishlari olib borilib, aholi uchun sayr qilish, yugurish va velosiped yo‘lakchalari, shuningdek, bolalar o‘yin maydonchalari va barbekyu zonalari qurilishi ko'zda tutilgan.

Qurilish ishlariga rahbarlik qilayotgan Axtam Hamroyevning so‘zlariga ko‘ra, hozirgi kunga kelib asosiy jarayonlarning 30 foizdan ortig‘i bajarib bo'lingan va loyihani joriy yilning oxirigacha to‘liq yakunlash rejalashtirilgan. Mutaxassislar noyabr oyiga qadar uzunligi qariyb 800 metr bo‘lgan himoya devorini qurib bitkazish va ko‘l o‘zanidan ortiqcha tuproqni olib chiqib ketish ishlarini yakunlamoqchi.

Loyiha mualliflaridan biri Muhiddin Xoliqovning ma'lum qilishicha, hududda tabiiy kanallar yoki oqova suv manbalari mavjud emasligi sababli, sun’iy ko‘lni to‘ldirish jarayoni yerosti quduqlari orqali amalga oshiriladi. Suv 30 metr chuqurlikdan maxsus nasoslar yordamida tortib chiqarilib, suv sathini avtomatik ravishda nazorat qilib boruvchi datchiklar bilan ta'minlanadi. Shuningdek, majmuada ekologik barqarorlikni ta'minlash maqsadida quyosh panellari hamda suvni filtrlash va ozonlash tizimlarini o‘rnatish rejalashtirilgan.

Source: www.gazeta.uz