Toshkent davlat sharqshunoslik universiteti bitiruvchilari mamlakatimizning chekka tumanlaridagi maktablarda ikki yil davomida faoliyat yuritish imkoniyatiga ega bo'ladilar. Mazkur tashabbus yosh mutaxassislarni qo'llab-quvvatlash va ta'lim sifatini oshirishga qaratilgan.

Bunday imkoniyat Teach for Uzbekistan (TFU) tashkiloti hamda Toshkent davlat sharqshunoslik universiteti o'rtasida imzolangan hamkorlik memorandumida ko'zda tutilgan. Tomonlar yirik shaharlardan uzoqda joylashgan ta'lim muassasalarida chet tillari, jumladan, sharq tillarini o'qitish darajasini yaxshilashni maqsad qilganlar.

Dastur doirasida universitetning iqtidorli bitiruvchilari ikki yillik Fellowship dasturiga qo'shilishlari mumkin bo'ladi. Ishtirokchilar maktablarda to'g'ridan-to'g'ri dars berish bilan bir qatorda, pedagogika va yetakchilik yo'nalishida intensiv treninglardan o'tadilar.

Yosh o'qituvchilarga asosiy oylik maoshdan tashqari qo'shimcha moliyaviy va uslubiy ko'mak ko'rsatilishi belgilangan. Dasturni muvaffaqiyatli tamomlaganidan so'ng ular 60 dan ortiq davlatlarni birlashtiruvchi Teach For All xalqaro tarmog'iga a'zo bo'ladilar.

Source: podrobno.uz