O‘zbekiston oliy ta’lim muassasalarida o‘qish kontraktlarini to‘lash hamda talabalikka qabul qilishni rasmiylashtirish muddati joriy yilning 1-noyabriga qadar uzaytirildi. Ushbu qaror ko‘plab talabalar va ularning ota-onalari uchun qo‘shimcha imkoniyat yaratish maqsadida qabul qilingani ta’kidlanmoqda.

Mazkur muddat bakalavriat hamda magistratura bosqichida tahsil olayotganlar, differensial kontrakt asosida talabalikka qabul qilinganlar, shuningdek, o‘qishini ko‘chirayotgan, tiklayotgan va qayta tiklayotgan shaxslarga nisbatan tatbiq etiladi. Mas’ul idoralarning bildirishicha, belgilangan muddatgacha talabalar bazaviy kontrakt qiymatining kamida 25 foizini, differensial kontrakt bo‘yicha esa kamida 50 foizini to‘liq to‘lashlari shart.

Shu bilan birga, kelgusidagi o‘zgarishlar qatorida, 2026/2027 o‘quv yilidan boshlab davlat OTMlarining kunduzgi bo‘limida o‘qiyotgan pedagog xodimlarning farzandlariga kontrakt summasining 30 foizi miqdorida kompensatsiya to‘lash tartibi joriy etilishi ma’lum qilindi. Ushbu imtiyozdan foydalanish uchun kontrakt.edu.uz platformasi orqali tegishli ariza topshirish talab etiladi.

Source: uznews.uz