O‘zbekiston Respublikasi Bosh prokuraturasi joriy yilning o‘tgan to‘qqiz oyi mobaynida kelib tushgan murojaatlar tahlilini taqdim etdi. Ushbu davr mobaynida mamlakat prokuratura organlariga jami 299 649 ta murojaat kelib tushgani maʼlum qilindi. Mazkur ko‘rsatkich aholining huquqiy masalalar bo‘yicha idoralarga murojaat qilish faolligi saqlanib qolayotganini ko‘rsatadi, biroq muammolarning aksariyati hal etilishi lozim bo‘lgan dolzarb masalalarligicha qolmoqda.
Murojaatlar bilan ishlash boshqarmasi boshlig‘i o‘rinbosari Murodiljon Mo‘minov ishtirokidagi brifingda keltirilgan raqamlarga ko‘ra, kelib tushgan ariza va shikoyatlarning 178 493 tasi prokuratura organlarida hal etilgan. Shundan 50 087 tasi qanoatlantirilgan bo‘lsa, 126 058 ta murojaat bo‘yicha fuqarolarga huquqiy tushuntirishlar berilgan. Eng ko‘p murojaatlar ichki ishlar vazirligi tizimidagi tergov masalalariga to‘g‘ri kelib, ular umumiy miqdorning 15 foizidan ortig‘ini yoki 45 313 tani tashkil etgan.
Shuningdek, hisobot davrida ijtimoiy-iqtisodiy yo‘nalishdagi, jumladan, moddiy yordam, nafaqa tayinlash, bola puli va tibbiy xizmat ko‘rsatish masalalari bo‘yicha 39 042 ta murojaat qayd etilgan. Aliment undirish hamda Majburiy ijro byurosi (MIB) xodimlarining harakatlaridan norozilik bildirilib kelingan murojaatlar soni esa 21 257 tani tashkil qilgan. Ayrim sohalarda murojaatlar o‘tgan yilning shu davriga nisbatan keskin oshgani kuzatilgan.
Xususan, tergovga qadar tekshiruv, surishtiruv va tergov masalalariga bog‘liq murojaatlar 3 316 taga ko‘paygan. Fuqarolik sud ishlari yuzasidan qabul qilingan qarorlardan noroziliklar 2 199 taga, jazoni ijro etish muassasalari xodimlarining xatti-harakatlari yuzasidan shikoyatlar esa 1 144 taga ortgan. Takroriy murojaatlarda ham sud va tergov sohasi yetakchilik qilib, 3 636 ta takroriy shikoyatning salmoqli qismi aynan shu yo‘nalishlarga to‘g‘ri kelgan.
Hududlar kesimidagi tahlillar Toshkent shahrida tergov, jinoyat ishlari bo‘yicha sud hujjatlaridan norozilik, MIB xodimlari harakatlari va ekologiyaga oid murojaatlar ko‘payganini ko‘rsatdi. Toshkent viloyatida yer va uy-joy, Farg‘onada fuqarolik sudlari qarorlari hamda ishga tiklash, Surxondaryoda maʼmuriy ishlar va mehnat munosabatlari, Xorazmda esa ijtimoiy-iqtisodiy huquqlar ijrosi bo‘yicha muammolar dolzarb bo‘lib qolgan. Muammolarni joyida hal etish maqsadida besh mingdan ortiq mahallada sayyor qabullar o‘tkazilgan.
Source: kun.uz