Yaqinda Toshkent shahrida joylashgan ikki ta'lim muassasasi o'quvchilari o'zaro tajriba almashish va birgalikda vaqt o'tkazish uchun yig'ildilar. Invento the Uzbek International School o'quvchilari tomonidan tayyorlangan tadbir davomida ishtirokchilar robototexnika, san'at va ingliz tili yo'nalishlarida o'z mahoratlarini sinab ko'rdilar. Tashkilotchilarning ta'kidlashicha, bunday uchrashuvlarning asosiy maqsadi shunchaki nazariy bilim berish emas, balki jonli muloqot va amaliy ko'nikmalarni rivojlantirishdan iborat edi.

Robototexnika bo'yicha tashkil etilgan maxsus mahorat darsida o'quvchilar turli robot modellarini yig'ishdi, ularning ishlash tamoyillari bilan yaqindan tanishdilar hamda yuzaga kelgan texnik vazifalarni birgalikda hal etishdi. 15-sonli maktab o'quvchilari ham jarayonga faol qo'shilib, o'z g'oyalarini taklif qilishdi va qiziqtirgan savollariga javob olishdi. Yosh ishtirokchilar birgalikda robotlarni yig'ish jarayonida turli yechimlarni muhokama qilib, erishilgan ilk natijalardan mamnun bo'ldilar.

Shuningdek, tadbir doirasida o'tkazilgan ijodiy mahorat darsida o'quvchilar o'zlarining fantaziyasini namoyon etish va san'at orqali o'z-o'zini ifoda etish imkoniga ega bo'ldilar. Birgalikdagi ijodiy jarayon ikki maktab o'quvchilariga bir-birini yaqinroq bilib olishga va eng qiziqarli g'oyalar aynan muloqot jarayonida tug'ilishiga yana bir bor amin bo'lishga yordam berdi.

Ingliz tili darsida esa asosiy e'tibor jonli muloqot va og'zaki nutqni amalda qo'llashga qaratildi. Ishtirokchilar turli topshiriqlarni bajarib, mavzularni muhokama qilishdi va o'z fikrlari bilan o'rtoqlashdilar. Iliq muhitda o'tgan uchrashuv o'quvchilarga o'z fikrlarini ingliz tilida yanada erkinroq bayon etishni o'rganishda ko'maklashdi.

Source: uznews.uz