O‘zbekiston Respublikasi Prezidenti Administratsiyasi rahbari Saida Mirziyoyeva Qashqadaryo viloyati narkologiya muassasasining faoliyati bilan yaqindan tanishdi. Tashrif davomida tibbiyot muassasasidagi mavjud sharoitlar, bemorlarni davolash jarayonlari va sohadagi mavjud muammolar chuqur o‘rganildi.

Rasmiy vakilning ta'kidlashicha, bunday og‘ir hududdan boshlanishi o‘zgarishlarning qanchalik muhimligini ko‘rsatadi. Bemorni davolashda nafaqat malakali tibbiy yordam va sharoitlar, balki samimiy e'tibor, bir og‘iz dalda ham inson hayotida muhim o‘rin tutishi qayd etildi.

Tashrif yakunlari bo‘yicha mahalliy va xalqaro ekspertlarni jalb etgan holda tibbiyotning ushbu yo‘nalishini tubdan yangilashga qaratilgan maxsus dastur ishlab chiqilishi e'lon qilindi. Mazkur tashabbus kasallikning oldini olish, samarali davolash hamda sifatli reabilitatsiya jarayonlarini o‘z ichiga olgan yaxlit tizimni yaratishni maqsad qilgan.

Source: kun.uz