Surxondaryo viloyati hokimligi Boysun tumanidagi ekologik hodisa natijasida yetkazilgan zarar miqdorini e’lon qildi. Neft tarkibli suyuqlikning oqib chiqishi uchun 8,5 milliard so‘mdan ortiq kompensatsiya hisoblab chiqilgan.

Ekologiya va iqlim o‘zgarishi milliy qo‘mitasi ma’lumotlariga ko‘ra, avariya Surxan Gas Chemical Operating Company qo‘shma korxonasiga tegishli quduqda yuz bergan. 23 aprel kuni kuchli yomg‘irlar sababli 1,2 tonna ifloslangan suyuqlik Xongaronsoy kanaliga tushib ketgan.

Ekologik inspeksiya hukumat me’yorlariga asosan atrof-muhitga yetkazilgan zararni hisoblab chiqdi. Endilikda kompaniya byudjetga 8,5 milliard so‘mdan ortiq mablag‘ni to‘lashi kerak.

Hozirda avariya oqibatlari bartaraf etilgan: suv neft aralashmalaridan tozalangan. Biroq tekshiruv davom etmoqda. Tugallangach, materiallar huquqni muhofaza qilish organlariga yuboriladi.

Source: podrobno.uz