️ O‘zbekiston energetika vaziri Jo‘rabek Mirzamaxmudov moliyachi va bloger Otabek Bakirovga nisbatan uning Telegram kanalidagi postlariga huquqiy baho berishni so‘rab ichki ishlar organlariga murojaat qilgan. Bu haqda Bakirovning o‘zi ma’lum qildi.

️ Vazir avvalgi arizasi bo‘yicha jinoyat ishi qo‘zg‘atish rad etilganidan keyin 2024-yil 26-dekabrda blogerning bir necha seriyali postlariga nisbatan shikoyat qilgan. 2026-yil 23-yanvarda Toshkent shahar IIBB jinoyat ishi qo‘zg‘atishni rad etgan, biroq 25-mart kuni Toshkent shahar prokuraturasi bu qarorni bekor qilgan. Hozirda ish Yashnobod IIBga tushirilgan.

️ Bakirovning ta’kidlashicha, shikoyat mazmuni metan zapravkalarda gaz bor-yo‘qligi va navbatlar haqida ma’lumot beruvchi Avto24 ilovasiga bildirilgan e’tirozlar bilan bog‘liq. Shuningdek, Toshkent tumanida gaz va elektr ta’minoti uzilishlari haqidagi postlar ham muhokama qilinmoqda.

️ Blogerning so‘zlariga ko‘ra, murojaat taxminan bir yarim yil avval e’lon qilingan postlarga taalluqli. U elektr ta’minotidagi uzilishlar muammosi hali ham saqlanib qolayotganini qayd etgan.

️ Otabek Bakirov taniqli moliyachi va jamoat arbobi bo‘lib, iqtisodiy masalalar muhokamasida faol ishtirok etadi. U o‘zining Bakiroo Telegram kanalida tahliliy materiallar va tanqidiy fikrlarini e’lon qilib boradi.

Source: www.gazeta.uz