Namangan viloyati Mingbuloq tumanida 4 yoshli bola ochiq qoldirilgan yuqori voltli transformator podstansiyasiga kirib, tok urishi natijasida ikki qo'lidan ajraldi. Hodisa 2025-yil 11-noyabr kuni Jamashuy qishlog'ida sodir bo'lgan.

Bolaning otasi Jumanazar Xolmatov aybdorlarning hech qanday yordam bermayotganini aytmoqda. "Uch yoshli o'g'lim tasodifan ochiq eshikli transformator punktiga kirib, kontaktlarni ushlab oldi. Operatsiya qilindi, ammo og'ir jarohatlar tufayli qo'llarini amputatsiya qilishga to'g'ri keldi. Men aybdorlarning jazolanishini talab qilaman", dedi otasi.

Tuman elektr ta'minoti korxonasi rahbari Bobur G'ulomqodirovning tushuntirishicha, bola otasi bilan mashinada o'tirgan, hojatxonaga chiqmoqchi bo'lib, topa olmagan va transformator punkti eshigini ochib ichiga kirgan. "Barcha yuqori voltli transformatorlarda qulflar bo'lishi kerak, ammo kimdir budkani o'zboshimchalik bilan ochib qoldirgan. Biz dori-darmon va pul bilan yordam berdik — korxonadan 60 million so'm, hokimiyatdan 50 million so'm", dedi u.

Hodisa yuzasidan usta I.S.ga nisbatan jinoiy ish qo'zg'atilgan. Sud uni 2 yilga axloq tuzatish ishlariga hukm qildi, ish haqining 20 foizi davlat foydasiga ushlab qolinadi. Shuningdek, u ishdan bo'shatilgan.

Bu birinchi bunday holat emas. Uch yil oldin Navoiyda 6 yoshli bola bolalar maydonchasi yonidagi transformatorga chiqib, qo'llaridan ajralgan edi. Yaqinda Farg'onada bog'cha tarbiyalanuvchisi yer osti transformatoriga yiqilib, og'ir kuyish jarohatlari olgan.

Source: kun.uz