Qozog‘iston Prezidenti Qasim-Jomart Toqayev O‘zbekiston bilan transchegaraviy suv ob’ektlarini birgalikda boshqarish va undan oqilona foydalanish to‘g‘risidagi bitimni ratifikatsiya qiluvchi qonunni imzoladi.

Hujjat umumiy suv resurslaridan kelishilgan holda foydalanish va davlatlararo ahamiyatga ega suv xo‘jaligi inshootlarining xavfsiz ishlashini nazarda tutadi. Kelishuvlarni amalga oshirish uchun tomonlar suv ob’ektlarini boshqarish masalalari bilan shug‘ullanadigan qo‘shma hukumatlararo komissiya tuzadilar.

Bitim 2025-yil 15-noyabrda Toshkentda O‘zbekiston va Qozog‘iston Oliy davlatlararo kengashining ikkinchi majlisi chog‘ida imzolangan edi. Hujjatning ratifikatsiyasi ikki davlat o‘rtasida suv taqsimotida muvofiqlashtirishni kuchaytirishi, nizolar xavfini kamaytirishi va Sirdaryo hamda unga bog‘liq suv xo‘jaligi ob’ektlariga qaram bo‘lgan hududlarning suv ta’minoti barqarorligini oshirishi kerak.

Eslatib o‘tamiz, avvalroq O‘zbekiston va Qozog‘iston Sirdaryoning transchegaraviy uchastkalarida suv hisobini yuritish uchun o‘nta avtomatlashtirilgan gidropost o‘rnatishga kelishgan edi. Har bir davlatda beshtadan bunday post paydo bo‘ladi.

Source: podrobno.uz