Tojikistonda 2026 yilning birinchi yarmida o‘z joniga qasd qilish va unga urinish holatlari bo‘yicha statistik ma’lumotlar e’lon qilindi. Mamlakatning Ayollar va oila ishlari qo‘mitasi raisi Bunafsha Fayziddinzodaning ma’lumotiga ko‘ra, jami 250 ta holat qayd etilgan bo‘lib, ulardan 138 tasi erkaklar, 112 tasi ayollar tomonidan sodir etilgan.

196 ta holatda odamlar vafot etgan, 54 ta urinishning oldi olingan. Voyaga yetmaganlar o‘rtasida 27 ta o‘g‘il bolalar va 18 ta qizlar ishtirokida holatlar qayd etilgan. Bolalar va o‘smirlar umumiy sonning 18 foizini tashkil qilgan.

Eng ko‘p bunday hodisalar mamlakatning Sug‘d viloyatida qayd etilgan. Bu mintaqadagi ijtimoiy-iqtisodiy muammolar va ruhiy salomatlik xizmatlarining yetishmasligi bilan bog‘liq bo‘lishi mumkin.

Taqqoslash uchun, JSSTning so‘nggi ma’lumotlariga ko‘ra, 2021 yilda O‘zbekistonda o‘z joniga qasd qilishdan o‘lim darajasi 100 ming aholiga 8,3 holatni tashkil etgan. Erkaklar orasida bu ko‘rsatkich 10,6, ayollar orasida esa 6,1 ni tashkil qilgan.

Avvalroq, Andijonda 19 yoshli yigitning oilaviy mojarodan so‘ng ko‘prikda o‘z joniga qasd qilishga urinishi huquq-tartibot xodimlari tomonidan oldi olingani haqida xabar berilgan edi.

Source: podrobno.uz