Minsk avtomobil zavodi (MAZ) O‘zbekistondan malakali mutaxassislarni jalb qilishni kengaytirish niyatida. Hozirda korxonada 120 dan ortiq o‘zbekistonlik ishlamoqda, ular oyiga o‘rtacha 800–1000 dollar maosh oladi.

Migratsiya agentligi direktori o‘rinbosari Eler Toshtemirov, O‘zbekistonning Belarusdagi elchixonasi vakillari va MAZ rahbariyati ishga qabul qilish istiqbollarini muhokama qildi. Tomonlar ishga joylashish tartibi, suhbatlar o‘tkazish, korxonada bevosita o‘qitish va yangi xodimlarni moslashtirish masalalarini ko‘rib chiqdi.

O‘zbek delegatsiyasi ishlab chiqarish sexlari, oshxona, yotoqxona va boshqa ijtimoiy ob’ektlarni ko‘zdan kechirdi. Vakillar u yerda ishlayotgan o‘zbekistonliklar bilan uchrashib, ularga mehnat va migratsiya qonunchiligi talablarini tushuntirdi.

Muzokaralar yakunida tomonlar nomzodlarni tanlashni tezlashtirish va korxonaning kadr ehtiyojlarini hisobga olgan holda mutaxassislarni jalb qilishni kengaytirishga kelishdi. Yangi ish o‘rinlari soni va qabul boshlanish muddatlari hozircha ma’lum emas.

Avvalroq Belarusga uyushgan ishga joylashish dasturining ilk ishtirokchilari turar joy va mehnat sharoitlari va’da qilinganidan farq qilganidan shikoyat qilgandi.

Source: podrobno.uz