18-oktabrga oʻtar kechasi Sankt-Peterburg shahri va Leningrad oblasti hududi yirik miqyosdagi dronlar hujumiga duch keldi. Maʼlum qilinishicha, ushbu zarbalar oqibatida neft terminali, yirik omborxonalar, infratuzilma obyektlari hamda turar joy binolarida jiddiy yongʻinlar kelib chiqqan. Rasmiy manbalarning xabar qilishicha, hodisa oqibatida bir kishi halok boʻlgan va oʻnlab fuqarolar turli darajada tan jarohatlari olgan.

Shahar gubernatori Aleksandr Beglovning taʼkidlashicha, Peterburg neft terminali va «Ruchi» neft bazasiga toʻgʻridan-toʻgʻri zarbalar berilgan boʻlib, buning ortidan hududda kuchli yongʻinlar boshlangan. Hujum paytida turar joy sektori ham qattiq jabr koʻrgan: kamida 12 ta koʻp qavatli va ikkita xususiy uy zarar koʻrgan. Favqulodda vaziyatlar xizmati maʼlumotlariga koʻra, kamida 15 kishi jarohatlangan va shifoxonalarga yotqizilgan, afsuski, bir kishining hayotini saqlab qolib boʻlmagan.

Shuningdek, hujum internet giganti VKontakte kompaniyasining shahardan tashqaridagi data-markazi hamda Ozon kompaniyasining yirik omboriga ham qaratilgan boʻlib, omborxonada yongʻin chiqqan, biroq xodimlar oʻz vaqtida evakuatsiya qilingani sababli jabrlanmagan. Zarbalar shahardagi muhim infratuzilmalarga, jumladan, kemalar qatnoviga moʻljallangan osma koʻprikka, «Vostochnaya» elektr nimstansiyasiga va Vasilevskiy orolidagi narkologiya shifoxonasiga ham ziyon yetkazgan.

Hujum oqibatida shahar va viloyatning bir qancha tumanlarida elektr energiyasi uzilishlari kuzatilgan, xususan, Leningrad oblastida 20 mingdan ortiq aholi chiroqsiz qolgan. Xavfsizlik choralari tufayli Pulkovo aeroporti vaqtincha faoliyatini toʻxtatib, yoʻlovchilar hamda xodimlar bombapanagohlarga yashiringan. Rossiya mudofaa vazirligi oʻz navbatida mamlakat boʻylab tunda 1000 dan ortiq dron zarbasi qaytarilganini daʼvo qilmoqda, biroq yuzaga kelgan vayronagarchiliklar koʻlami shahar infratuzilmasiga jiddiy zarar yetganini koʻrsatmoqda.

Source: kun.uz