Fransiya hukumati Yevropa Ittifoqiga kirmaydigan mamlakatlar talabalari uchun o‘quv to‘lovlarini 16 barobar oshirish rejasini e’lon qildi. Bu qaror mamlakatda keng noroziliklarga sabab bo‘ldi va oliy ta’lim sohasidagi muammolarni yuzaga chiqardi.

“Fransiyani tanlang” dasturi doirasida 2026/27 o‘quv yilidan boshlab bakalavriat uchun yillik to‘lov 2895 yevro, magistratura uchun esa 3941 yevro etib belgilandi. Bu avvalgi narxlardan 16 barobar ko‘p bo‘lib, universitetlarga qo‘shimcha 250 million yevro olib kelishi kutilmoqda.

Yevropa Talabalar Ittifoqi va Fransiya Talabalar Uyushmalari Federatsiyasi bu rejani “tenglikka zarba” deb atadi. Ularning fikricha, ta’lim olish imkoniyati millat va moliyaviy ahvolga bog‘liq bo‘lib qolmoqda.

Tuluz Iqtisodiyot maktabi professori Kristian Gollier esa o‘zgarish zarurligini ta’kidlaydi. Uning yozishicha, Fransiyada yosh o‘qituvchilarning yillik maoshi 30 000 yevro atrofida, eng yaxshi universitetlar esa 5-10 barobar ko‘p taklif qiladi.

Niderlandiyada Yevropa Ittifoqi talabalari uchun bakalavriat to‘lovi 2500 yevro, xorijliklar uchun 13 000-32 000 yevro. Gollandiya hukumati ingliz tilidagi kurslarni cheklab, talabalar sonini 5% ga kamaytirdi.

Buyuk Britaniyada xorijlik talabalar to‘lovi 44 000 yevrogacha yetadi, mahalliy talabalar uchun esa 11 300 yevro bilan cheklangan. Brexitdan keyin Yevropa Ittifoqi talabalari soni kamaygan bo‘lsa-da, Angliya xorijlik talabalar bo‘yicha Yevropada yetakchi.

Shveytsariya esa aksincha, 2024-yil dekabridagi kelishuvga ko‘ra, xorijlik va mahalliy talabalar to‘lovlarini tenglashtirdi. Narxlar semestr uchun 800 yevro atrofida.

Ispaniya va Portugaliyada xorijlik talabalar soni oshib bormoqda. Germaniyada esa to‘lovlar eng past darajada – semestr uchun 200-500 yevro. Avstriya, Xorvatiya, Irlandiya, Gretsiya va Shvetsiyada Yevropa Ittifoqi talabalari uchun arzon yoki bepul dasturlar mavjud.

Source: www.dw.com