Ispaniya soliq idoralari kolumbiyalik qo‘shiqchi Shakiraga 55 million yevro (64 million dollar) miqdoridagi soliqni qaytarishga majbur bo‘ldi. Madriddagi Milliy sud qaroriga ko‘ra, bu mablag‘ 2011-yilgi soliq nizosi davrida noqonuniy undirilgan.

Sud hujjatlariga ko‘ra, qaror aprel oyi o‘rtalarida qabul qilingan, ammo ommaviy axborot vositalariga dushanba kuni ma’lum bo‘ldi. Qaror Shakiraning apellyatsiyasidan so‘ng chiqarilgan bo‘lib, u o‘sha paytda Ispaniyaning to‘liq rezidenti emasligini uzoq vaqt davomida ta’kidlab kelgan.

Shakiraning advokatlari uning sobiq eri, futbolchi Jerar Piké bilan birinchi uyni 2012-yilda sotib olganini va tez-tez gastrol safarlarida bo‘lgani uchun 2011-yilda Ispaniyada talab qilingan 183 kun yashay olmaganini ta’kidlagan. Sud bu dalillarni qabul qilib, 2021-yilda undirilgan o‘n millionlab yevrolarni qaytarishni buyurdi.

Advokat Xose Luis Prada bayonotida: “Bu qaror sakkiz yillik sinovdan so‘ng qabul qilindi, bu ma’muriy amaliyotdagi jiddiy kamchiliklarni aks ettiradi”, dedi. Shakira esa bu qaror “aybdor deb hisoblanib, aybsizligini isbotlashga majbur bo‘lgan minglab oddiy fuqarolar uchun pretsedent bo‘lishiga umid qilishini” bildirdi.

2023-yilda qo‘shiqchi 2012-2014 yillar oralig‘idagi alohida soliq to‘lashdan bo‘yin tovlash ishi bo‘yicha prokuratura bilan kelishuvga erishgan edi. U sud jarayonidan qochish uchun aybini tan olib, 7,3 million yevro to‘lashga rozi bo‘lgan. Shakira aybni oilasini keyingi sud jarayonlaridan saqlash uchun tan olganini da’vo qilgan.

Shakiraning sobiq eri, “Barselona” yulduzi Piké ham Ispaniyadagi yirik soliq firibgarlik ishlariga aralashgan, biroq 2021-yilda Oliy sud tomonidan oqlangan.

Source: www.dw.com