Tayvan prezidenti Lay Sin-te chorshanba kuni o‘z mamlakatining kelajagini “xorijiy kuchlar” hal qila olmasligini aytdi va Xitoy bilan mojaroni oldini olish uchun mudofaa xarajatlarini oshirishga va’da berdi.

“Tayvanning kelajagini xorijiy kuchlar hal qila olmaydi, uni qo‘rquv, bo‘linish yoki qisqa muddatli manfaatlar garoviga aylantirib bo‘lmaydi”, dedi Lay o‘z prezidentligining ikkinchi yiliga bag‘ishlangan nutqida. “Tayvan o‘zini himoya qilish va Tayvan bo‘g‘ozida tinchlik va barqarorlikni saqlash qobiliyatiga ega bo‘lishi kerak.”

Pekin o‘zini o‘zi boshqaradigan orolni o‘z hududi deb da’vo qiladi va uni kuch bilan egallash imkoniyatini istisno etmaydi.

Yaqinda AQSh rejimi rahbari Donald Tramp Fox News telekanaliga bergan intervyusida AQShning Tayvanga qurol savdosi Pekin bilan muzokaralarda bosim vositasi sifatida ishlatilishi mumkinligini aytdi. Tramp, shuningdek, Layga qo‘ng‘iroq qilishi mumkinligini ham bildirdi.

Lay, agar Tramp bilan gaplashish imkoniyati berilsa, Pekin tinchlikni buzayotgani va mintaqadagi keskinlikni oshirayotganini ta’kidlashini aytdi. “Hech bir davlat Tayvanni anneksiya qilishga haqli emas. Tayvan xalqi demokratik va erkin hayot tarzini izlaydi, demokratiya va erkinlik provokatsiya sifatida qaralmasligi kerak”, dedi Lay.

1979-yilda Vashington diplomatik tan olinishini Taypeydan Pekinga o‘tkazganidan beri ikki davlat rahbarlari o‘rtasida to‘g‘ridan-to‘g‘ri ommaviy suhbat bo‘lmagan.

Shu bilan birga, Xitoyning Tayvan ishlari bo‘yicha idorasi Tayvan xalqini Pekin bilan Tayvan bo‘g‘ozida barqarorlikni saqlash uchun hamkorlik qilishga chaqirdi. Xitoy hukumati organi “birlashish va milliy tiklanish” kelajagini yaratishga chaqirdi.

Source: www.dw.com