Qatardagi muzokaralar Eron uchun muvaffaqiyatsiz yakunlandi. Tehron Qatardagi banklarda muzlatilgan 12 milliard dollarni blokdan chiqarishga urindi, biroq Doha bu talabni rad etdi.

Iran International telekanalining xabar berishicha, Doha Eron delegatsiyasining ultimatumini rad etib, so‘ralgan mablag‘ning faqat yarmini qattiq nazorat ostida berishga rozi bo‘lgan. Ajratilgan 6 milliard dollarni Tehron to‘g‘ridan-to‘g‘ri ololmaydi – Qatar faqat maqsadli kredit liniyasini ochadi, undan Eron faqat Qatarning ichki bozorida gumanitar tovarlar sotib olish uchun foydalanishi mumkin.

Qatar pozitsiyasi AQShning to‘g‘ridan-to‘g‘ri bosimi ostida shakllangan. Oq uy Eron hukumatiga “jonli” pul berilishiga qat’iy qarshi chiqqan. Manbalarga ko‘ra, AQsh ma’muriyati to‘g‘ridan-to‘g‘ri moliyaviy inyeksiyalar Tehronga iqtisodiy tanaffus berib, davlat sektorida ish haqi qarzlarini to‘lashga va ichki zaxiralarni qurol sotib olishga yo‘naltirishga imkon berishidan xavotirda.

Hozirgi diplomatik boshi berk ko‘cha Eronning muzokara taktikasini keskin qattiqlashtirishi natijasida yuzaga keldi. Tehron Qatardagi milliardlarni o‘zining murosasiz sharti sifatida belgilagan edi. Iran International manbalariga ko‘ra, bu 12 milliard dollar faqat diplomatik yo‘l xaritasini ishga tushirish uchun dastlabki tranch hisoblangan, Eronning global maqsadi esa butun dunyo bo‘ylab muzlatilgan barcha aktivlarini to‘liq blokdan chiqarishdir.

Hozircha moliyaviy mojaro AQSh va Eron o‘rtasidagi ramka kelishuvini imzolash imkoniyatini butunlay yo‘q qilmasligi uchun barcha tomonlar Doha muzokaralari tafsilotlari bo‘yicha qat’iy maxfiylikka rioya qilishga kelishib oldi.

Source: podrobno.uz