Fransiya terma jamoasi hujumchisi Kilian Mbappe Jahon chempionati ochilish o'yinida Senegalga qarshi ikkita gol urib, jahon futbolining eng buyuk o'yinchilaridan biri ekanligini yana bir bor isbotladi. Uchrashuv 3:1 hisobida fransiyaliklarning g'alabasi bilan yakunlandi.

27 yoshli futbolchi ushbu o'yinda Fransiya terma jamoasi safidagi 58-golini urib, Olivye Jiruni ortda qoldirdi va mamlakat tarixidagi eng yaxshi to'purarga aylandi. Qizig'i shundaki, aynan Jiru o'sha kuni sharhlovchi sifatida ishlagan va Mbappening 96-daqiqadagi golini jonli efirda tabriklagan.

Mbappe, shuningdek, Jahon chempionatlaridagi gollari sonini 14 taga yetkazib, Jast Fonenning 13 gollik rekordini yangiladi. U endi turnir tarixidagi eng yosh 14 gol muallifi hisoblanadi va Miroslav Klozening eng ko'p gol urish bo'yicha jahon chempionati rekordiga (16 gol) yaqinlashmoqda.

Uchrashuvning 66-daqiqasida Mbappe Maykl Olisening ajoyib uzatmasini golga aylantirib, hisobni ochdi. Keyinroq Bredli Barkola zaxiradan maydonga tushib ikkinchi golni urdi, ammo senegallik Ibrahim Mbaye to'purarlik qildi. Eng so'nggi daqiqalarda esa Mbappe uzoq masofadan kuchli zarba bilan yakuniy nuqtani qo'ydi.

Mbappe ijtimoiy tarmoqlarda shaxsiy yutuqlari haqida gapirmasdan, faqat jamoaning g'alabasini nishonladi: "Har doim g'alaba bilan boshlash muhim. Yo'l uzoq, ammo biz tayyormiz", deb yozdi u Instagram'da.

Eslatib o'tamiz, Mbappe 2018-yilda 19 yoshida Fransiyani jahon chempioni qilgan edi. U 2022-yilgi finalda xet-trik qayd etgan bo'lsa-da, Argentina chempion bo'lgan edi. Hozirda u ketma-ket uchta jahon chempionatida gol urgan yagona futbolchi va besh xil o'yinda ikki yoki undan ortiq gol urgan yagona o'yinchidir.

Source: www.aljazeera.com